La Portavoz de Somos Uviéu, Ana Taboada, treslladó a la próxima Comisión d’Educación del Conceyu d’Uviéu la reclamación de les AMPAs de que se meyoren les inversiones en materia de sistemes de ventilación mecánico y mididores de CO2 nos colexos municipales.
Recuerden qu’existen víes p’aprobar estes inversiones anque nun vayan salir los presupuestos municipales
Taboada insistió en que “les families tienen muncha preocupación pola situación sanitaria nos centros educativos y tán demandando actuaciones nesti sen”. Tamién se demanden, según la conceyala, “midíes de meyora del aislamientu térmico de los centros de cara al fríu ivernal y la renovación de les instalaciones eléctriques“.
Dende Somos opinen que “magar que’l Bipartitu nun fizo los deberes y nun habrá presupuestu, si quiere protexer la salú de la comunidá educativa, existen víes pa procurar estes inversiones tán necesaries“. Sicasí, Somos Uviéu recuerda que pa ello “hai que tener voluntá política“. “Cosa que barruntamos que nun tendrán”, acabó la formación.
