Siete militantes y exmilitantes del sindicatu CNT, y l’activista sin techu Lagarder Danciu, enfréntense a una petición de cárcel que va dende los dos años y mediu que propón la Fiscalía hasta los 15 que demanda l’acusación particular, poles concentraciones realizaes ante la Pastelería Suiza (avenida Schultz de Xixón) nel 2017, nel marcu d’un conflictu llaboral qu’afectaba a una empleada d’esti establecimientu. El xuiciu entama esti llunes, 18 de xineru.
Los ocho activistes tán acusaos de dellos delitos, ente los que destaquen coacciones y obstrucción a la xusticia. El primeru tendría que ver coles concentraciones realizaes ante’l llocal. Los propietarios del negociu defendieron nel so día que tuvieron que zarralu por culpa d’esta presión. Sin embargu, dende’l sindicatu asegúrase que yá había anuncios en prensa poniendo en venta’l baxu comercial antes del entamu del conflictu. Una de les persones acusaes recalca que toles concentraciones fueron pacífiques y la mayoría d’elles contaben cola correspondiente autorización. Nos casos nos que nun hubo permisu, celebráronse igualmente baxo vixilancia policial.
L’acusación particular yá presentara denuncies polos mesmos fechos y resultaron archivaes
El d’obstrucción refierse al intentu de la CNT de que se retirara una denuncia contra’l compañeru sentimental de la trabayadora, tres un incidente que se produxo ente él y los propietarios del comerciu. Ún de los denunciaos asegura a Nortes que’l sindicatu únicamente intentó mediar pa solucionar esti asuntu sin llegar a xuiciu, pero sin cometer nengún delitu d’obstrucción.
La Fiscalía pide por estos dos delitos dos años y mediu de cárcel pa caún de los acusaos. Pela so parte, l’acusación particular suma dellos delitos más, ente los que tán inxuries o calumnies, usurpación d’identidá y amenaces, y pide un total de 13 pa siete de los acusaos y 15 años pa otru. Dase la circunstancia de que los propietarios del llocal yá presentaren denuncies por estos delitos resultando toes archivaes, nun siendo la de calumnies, la única pendiente de decisión xudicial y que finalmente dio llugar a esti procesu. L’abogáu representante de l’acusación particular ye l’antiguu xuez de l’Audiencia Nacional Javier Gómez Bermúdez.
