L’asociación Iniciativa pol Asturianu reclamó al Conceyu d’Uviéu la presencia de la llingua na nueva señalética qu’esta Alministración va instalar. El Consistoriu capitalín anunció esta selmana’l cambiu, al traviés d’un contratu públicu, de cartelería y de rótulos na capital.
La organización quier, con esta propuesta, que la llingua asturiana vaya ganando presencia na capital asturiana. Dende la organización aclararon que “la presencia del asturianu nesta cartelería nun va xenerar
nengún costu adicional al contratu. La capital d’Asturies nun puede quedar nun cercu nel que nun se faiga un usu normal del idioma y de la toponimia oficial dende la municipalidá”.
Piden a PP y Ciudadanos que demuestren que tán a favor de la Llei de Promoción y Usu del Asturianu
Iniciativa pol Asturianu quiso tamién facer un llamáu al Gobiernu d’Uviéu “pa dar un pasu y que l’asturianu vaya ganando presencia nos espacios públicos y na cartelería d’Uviéu como se facía col gallegu en Vigo o Santiago cuando gobernaba’l PP. La capital d’Asturies nun puede quedar
nun cercu nel que nun de faiga un usu normal del idioma dende la municipalidá”.
Nesi sen, dende la entidá pidieron el cumplimientu de la Llei d’Usu, sobremanera dempués de la defensa que d’esta norma fizo’l diputáu de Ciudadanos Sergio García va unos díes en Twitter.
“Si dende Ciudadanos s’amparen na Llei d’Usu creemos que ye un momentu ideal pa facer realidá esa defensa d’esta Llei. Ye una bona ocasión de demostrar que tan d’alcuerdu con esta Llei. Tanto’l PP como Ciudadanos tienen la oportunidá de cumplir la Llei d’Usu, qu’hai que
cumplila, desarrollala y dar exemplu”.
Amás, Iniciativa pol Asturianu solicitó la presencia de la llingua asturiana na programación d’esti Xacobéu 2021. Dende la organización apuntaron que “la conmemoración del Xacobéu d’esti añu, qu’entamó con Alfonso II dende Uviéu, ye una oportunidá mui bona pa promocionar
l’idioma como faen los gallegos col suyu”.
