Correos decidió unillateralmente nun renovar el contratu de paquetería que dende hai cuatro años firmaba con Alberto Uría, productor de miel d’Ibias y responsable de la firma artesanal Miel Outurelos. ¿El motivu? La so facturación nun algamba los 600 euros, y poro nun resultaba rentable. Como alternativa, la entidá propúnxo-y ofrecer el so productu en Correos Market, la nueva comercializadora del ente públicu, que cobra comisión por venta, a la manera d’Amazon.
¿Una entidá pública que presume d’apoyar a la España Vaciada tien que buscar la rentabilidá y non el serviciu públicu? Ye la reflexón qu‘Alberto Uría plantéase dende qu’entamó la so batalla va un mes. Esti ‘abeyeiro’ llevaba dellos años enviando los sos tarros de miel dende’l so pueblu del conceyu d’Ibias a los sos clientes al traviés del serviciu de paquetería de Correos. Pa ello firmaba un contratu añal que se renovaba automáticamente al final de cada exerciciu.
Pero esti añu nun foi asina. Según esplica a Nortes, el 28 d’avientu recibió una carta anunciándo-y la rescisión unillateral del contratu. Cuando llamó pa pidir esplicaciones un comercial de Correos díxo-y que los sos envíos nun salíen rentables por ser inferiores a 600 euros al añu.
“Yo monté en cólera. Esti añu precisamente, coles dificultaes qu’hubo, siendo autónomu y na zona rural, dícenme que nun salgo rentable. Tratáronme como un númberu”, quéxase’l productor. Recuerda amás que la decisión nun respetó la llegalidá “nin en plazu (hai qu’avisar con un mes d’antelación), nin en formes”. Según Uría, dende Correos esplicáron-y que’l serviciu de facturación ta esternalizáu n’otra empresa que revisó los contratos y decidió prescindir de los que nun son rentables.
Dempués d’entamar una campaña de denuncia de la situación en redes sociales, l’ente públicu ofreció-y la so solución: Correos Market. Ye la nueva comercializadora creada por Correos y publicitada na so campaña #YoMeQuedo, dirixida en teoría a apoyar a los habitantes de les zones rurales.
L’alternativa ye la comercializadora Correos Market, un serviciu de comisión por venta
Tien la ventaya de que meyora les condiciones d’envío, pero la desventaya de que ye una comercializadora: cobra comisión por venta del 5 por cientu y ye ella la que decide con qué vendedores trabaya y con cuálos non. “Ya nun ye un serviciu públicu. Ellos deciden si te venden el productu, siempre en condiciones de rentabilidá”. Nel casu del Miel Outurelos, el contratu firmáu respeta la venta directa. Ye dicir, si’l cliente quier acudir directamente al productor a comprar, sin usar Correos Market, les condiciones d’envíu serán les mesmes y nun habrá comisión por venta. Pero según Uría, ye una conquista suya, dempués de “muncho pelear”, y non una condición xeneral.
Esti apicultor considera que “una empresa de capital cien por cien públicu tien la obligación d’apoyar a los autonónomos de les zones rurales, y non buscar criterios de rentabilidá”.
