La organización Andecha Astur presentó, como forma de protesta irónica, la candidatura del emiratu Abu Dhabi, al que se fugó’l nomáu rei eméritu Juan Carlos de Borbón, como candidatu al Pueblu Exemplar, nel marcu de la XXXII edición de los premios que concede la Fundación Princesa d’Asturies nesti añu 2021.
“Fartos de la bufoná que representa’l concursu neofranquista Pueblu Exemplar”, Andecha Astur esplicó nuna nota de prensa qu’esti añu quier participar “nesta comedia española presentando candidatura propia”, utilizando “la ironía como arma política”.
Asina, na candidatura, Andecha señala qu’Abu Dhabi cumple dellos de los criterios pa la concesión del premiu. Diz que l’Emiratu ye “un llugar que destaca polos sos manifestamientos de solidaridá sobresalientes, comu l’acoyía y proteición del ciudadanu español Juan Carlos I de Borbón, qu’abandonó apriesa l’Estáu español tres facese públicos dalgunos de los sos enguedeyos financieros y fiscales”. Amás,
Abu Dhabi ye tamién “un llugar qu’afala davezu iniciatives d’impulsu económicu y social, comu amuesa al sofitar de contino les aiciones que, dende aquel Emiratu, protagoniza’l ciudadanu español Juan Carlos I de Borbón pa caltener y ameyorar los sos negocios”, añade. A lo último, señala tamién “que los dirixentes y habitantes d’Abu Dabi carauterícense por un tipismu meritoriu, compuestu principalmente de tres rasgos notorios: el so calter campechanu, la so facilidá pa enllenase d’arguyu y satisfación y la importancia que na so fraseoloxía tien la espresión ‘La xusticia ye igual pa toos'”.
