Mui males noticies pa la diputada del PP na Xunta Xeneral, Gloria García, y pal de Vox, Ignacio Blanco. Definitivamente necesitarán un traductor que-yos esplique que bonos díes significa ‘buenos días’. El Tribunal Constitucional refugó’l recursu del partíu d’ultraderecha contra la modificación de la normativa del parlamentu autonómicu pa que los miembros del Gobiernu puean dirixise a la cámara en llingua asturiana.
El diariu El Mundo informó esti xueves de la decisión del Altu Tribunal, que daráse a conocer oficialmente la selmana qu’entra. Según informó esti periódicu, el ponente de la sentencia foi Cándido Conde-Pumpido, ex fiscal xeneral del Estáu, y contó col votu en contra de la vicepresidenta del TC, Encarnación Roca.
La Xunta Xeneral aprobó en xunetu pasáu la modificación del reglamentu pa permitir l’usu de la llingua asturiana nes sesiones parlamentaries. El 1 d’ochobre del 2019 la diputada del PP, Gloria García, y el diputáu de Vox, Ignacio Blanco, impidieron una intervención de la conseyera de Cultura, Berta Piñán, por ser n’asturianu, basándose nuna determinada interpretación de la normativa parlamentaria. García, natural de Mieres, aseguró que necesitaría un traductor pa comprender a Piñán.
Esta controversia foi’l motivu pol que se cambió la normativa pa que los miembros del Gobiernu pudieren dirixise a la cámara n’asturianu, modificación que foi recurrida por Vox ante’l Constitucional.
UNA LLINGUA PRESENTE NEL PARLAMENTU DENDE VA MUCHOS AÑOS
La de Berta Piñán aquel día nun yera la primer intervención n’asturianu na Xunta Xeneral. Nin muncho menos. Diputaos de diferentes grupos políticos lleven muchos años usando l’asturianu nes sos intervenciones, sin que naide nunca planteara problemes de comprensión.
DEllos diputaos usen l’asturianu na cámara y naide plantea problemes de comprensión
Yá nos años 90 el diputáu del Partíu Asturianista, Xuan Xosé Sánchez Vicente, facía les sos intervenciones n’asturianu. Dempués vinieron otros. Andrés Ron, parlamentariu de Podemos, utilizaba siempre l’asturianu, yá seya na variante central o occidental, pa espresase nos plenos y nes comisiones. Agora Rafa Palacios y Nuria Rodríguez, diputaos de Podemos Asturies, tamién lo faen davezu, y en payares del 2019 foi’l diputáu del PP, Álvaro Queipo, el qu’entamó una intervención en gallego-asturianu nun debate sobre’l salariu social.
El problema de la normativa de la cámara, según la interpretación de los lletraos, ye que sí taben permitíes les intervenciones de diputaos o de persones convocaes en comisiones, pero non de los miembros del Gobiernu. Ese ye la modificación llegal que Vox recurrió.
