José Luis Iglesias Riopedre abandonó esta tarde’l Centru Penitenciariu d’Asturies en coche acompañáu pol so fíu tres ser puestu en llibertá condicional por decisión xudicial. El que fuera conseyeru d’Educación y Ciencia nel segundu Gobiernu presidíu por Vicente Álvarez Areces taba cumpliendo una pena de cinco años y dos meses de prisión por delitos de prevaricación y cofechu nel llamáu ‘casu Marea’. El condenáu tien 81 años d’edá y problemes graves de salú, motivu pol que dende ámbitos distintes pidieran que-y concedieran el tercer grau o réxime de semillibertá.
L’Asociación Española pal Derechu Internacional de los Derechos Humanos (AEDIDH) espresara ayeri’l so esmolecimientu pola situación de Iglesias Riopedre y pidió al Xulgáu de Vixilancia Penitenciaria d’Asturies que-y concediera “urxentemente” el réxime del tercer grau. L’AEDIDH, que preside’l xurista asturianu Carlos Villán Durán (profesor universitariu de Derechu Internacional y ex miembru de la Oficina del Altu Comisionáu de Naciones Xuníes pa los Derechos Humanos en Xinebra), camentaba que “ensin perxuiciu de la llegalidá de la condena impuesta, ha de tenese en cuenta la so edá avanzada y el so estáu grave de salú, que faen aconseyable revisar la so situación carcelaria con criterios d’humanidá, col fin de que’l so fallecimientu nun se produza nun recintu carcelariu”. La mentada asociación recordaba que la concesión del tercer grau yera tamién una pitición de la Dirección Xeneral d’Instituciones Penitenciaries y que la negación d’esi réxime de semillibertá “podría comprometer la responsabilidá internacional d’España por presunta violación del Pactu Internacional de Derechos Civiles y Políticos y de la Convención contra la Tortura y Otros Tratos y Penes Crueles, Inhumanos o Degradantes, dambos ratificaos por España y de cumplimientu obligáu”.
Pero’l fechu determinante foi’l cambiu d’actitú del ministeriu fiscal, que se podució esta mesma mañana. La Fiscalía, hasta agora contraria a la concesión del tercer grau, apoyóse nos informes médicos que certifiquen la precariedá del estáu de salú física y mental de Riopedre pa comunicar al Xulgáu de Vixilancia Penitenciaria que remocicaba’l so dictame anterior, contrariu a la concesión del tercer grau. El propiu Riopedre, con dolencies cardiaques y d’otra mena, amosó en febreru, a traviés d’un escritu remitíu a la xueza, el so arrepentimientu pola implicación na trama de corrupción que lu mandó a la cárcel, pidió perdón y espresó la pitición de nun morrer na cárcel.
