El Centru Social La Semiente, de L’Entregu, entama pa esti xueves, día 15, a les siete de la tarde , una presentación online de la edición n’asturianu de 1984, la novela de George Orwell que tornó del inglés Xesús González Rato. Nel actu, que va poder siguise a traviés de Facebook, van participar el traductor y Rafa Rodríguez Valdés, filólogu y responsable de la colección Calume, d’Ediciones Trabe, a la que dio estrena esti títulu.
1984 ye la obra más nomada del escritor y periodista británicu George Orwell (1903-1950), autor de media docena de noveles y de tres llibros de non ficción. Publicóse n’inglés en 1949, un añu enantes de la muerte temprana del autor, que retrató nesta distopía ambientada en 1984 una sociedá totalitaria gobernada pol Partíu Únicu y vixilada pol Hermanu Mayor o Hermanu Grande. La novela traducióse a una montonera de llingües y publicóse n’asturianu n’avientu de 2019 como títulu primeru de la colección Calume, na que tamién s’editó va unos meses La naranxa mecánica, del autor británicu Anthony Burguess, tornada del inglés al asturianu pol poeta y traductor José Luis Piquero.
