Les organizaciones y colectivos que sofiten Vía Campesina y la Campaña Asturiana pola Soberanía Alimentaria entamen dellos actos alredor del Día Internacional de les Lluches Campesines, que se conmemora’l 17 d’abril en recuerdu de los diecinueve campesinos del Movimento dos Trabalhadores Rurais Sem Terra (MST) asesinaos nesa fecha de 1996 nel estáu brasileñu de Pará. Llangréu, Uviéu, Avilés y Xixón van acoyer les actividaes culturales, informatives y medioambientales programaes pal xueves y vienres próximos.
El vienres, día 16, va llevase a cau una acción de concienciación delantre del Ayuntamientu de Llangréu, a les doce del mediudía. Pela tarde, a les seis, el local de Cambalache, na cai Martínez Vigil d’Uviéu, va acoyer la presentación de la esposición Entre cuidados y resistencias: género y medioambiente. El sábadu, día 17, va haber una actividá teatral na plaza avilesina d’El Parche, a les doce y media del mediudía, y pa les cinco de la tarde hai prevista n’El Solarón de Xixón una plantación d’arbolinos y la presentación del llibru Diario de una campesina (Tierra de Sueños, 2021), del que ye autora la uvieína Laura Ibarra Telenti.
Expo Cambalache
Va veinticinco años, na Cume Mundial de l’Alimentación celebrada en Roma na seronda de 1996, Vía Campesina presentó la so propuesta de soberanía alimentaria “pa oponese al destructivu modelu industrial capitalista que sigue causando fame, desigualdá y crisis climática”, denuncien los colectivos convocantes, qu’afirmen que “la respuesta de les organizaciones campesines de tol mundu xuníes en Vía Campesina ye la llucha pola soberanía alimentaria”.
Asturies, alvierten, ye un exemplu del “procesu de destrucción al que se ve sometíu’l nuesu campu, como consecuencia d’unes polítiques dictaes en despachos pesllaos de ciudaes ayenes a la realidá de la producción agraria. Les campesines y campesinos asturianos desapaecen o sobreviven a base de grandes esfuercios”. P’avanzar hacia la soberanía alimentaria ven necesario “l’apoyu decidíu a la producción agroecolóxica llocal. N’Asturies fai años que va afitándose una rede de pequeñes y pequeños productores que, magar les dificultaes crecientes, lluchen por caltener unes formes d’economía y de vida que-yos permitan siguir viviendo de cautivar y curiar el terruñu”.
