Nueve asociaciones d’Euskadi, Navarra, Aragón, Galicia, Valladolid y Asturies en representación de más de mil chigres en total acaben de crear la Coordinadora Estatal d’Hostelería en Llucha, que naz col oxetivu d’esixir al Gobiernu central “midíes reales y efectives” pa ún de los sectores más castigaos pola situación d’emerxencia sociosanitaria. Les asociaciones que decidieron dar esti pasu son Bizkaiko Tabernariak, MasQueBares, SOS Ostalaritza, Ostalaritza Aurrera, Kutxiko Taskeroak, Gasteiz eta Arabako Ostalaritza, ShOStalaría Galiza, SOS Hostelería Aragón y Hostelería con Conciencia d’Asturies.
Nun comunicáu nel qu’informen del nacimientu de la Coordinadora señalen que “somos la hostelería del barriu, somos independientes, desvinculaes de les grandes patronales d’hostelería, y organizámonos pa dar voz a los nuesos compañeros y compañeres, que lleven esti trabayu nes venes, respetando, defendiendo y esixendo que se cumplan unos derechos llaborales que lleven años siendo pisoteaos”. Piden al Executivu central que ponga en marcha “ayudes directes acordies a la situación, teniendo en cuenta qu’endeudase con créditos ICO solo empeora la solvencia y el futuru de los nuesos negocios y les nueses vides”.
A la izquierda, David Sampedro, presidente de Hostelería con Conciencia FOTO: Luis Sevilla
Consideren que les ayudes han de dir sobre too a “los sectores que permanecieran más tiempu zarraos, siendo ésti’l principal baremu pa tener en cuenta a la hora d’executales”, y que “la cuantía destinada a les persones autónomes n’estimación oxetiva (módulos) ha de ser mayor que los tres mil euros anunciaos pa contrarrestar más d’un añu de perdes económiques y deudes xeneraes”. Reclamen que “cualesquier persona que sufriera’l pieslle decretáu del so negociu y xenerara deudes a partir del 14 de marzu de 2020 ha de poder acoyese a les ayudes ensin nengún tipu de problema”.
La Coordinadora Estatal d’Hostelería en Llucha quier que s’allarguen hasta l’añu 2022
La Coordinadora Estatal d’Hostelería en Llucha quier que s’allarguen hasta l’añu 2022 los ERTEs “pa evitar les quiebres de los nuesos negocios” y que seya “obligatorio caltener el puestu de trabayu seis meses dempués de la finalización del espediente”. Pide amás que les persones afectaes polos Espedientes de Regulación Temporal d’Emplegu queden llibres de “les sos obligaciones fiscales na Declaración de la Renta. Al empar esiximos que toa ayuda que provenga de l’Alministración central seya de calter non contributivu”.
