L’Asociación Cultural El Llavaderu, de La Pola Siero, organiza pal próximu xueves, día 15, una presentación online del llibru La renta básica, ¿por qué y para qué? (Catarata, 2021), del economista catalán Daniel Raventós. L’actu, que va desarrollase a les ocho de la tarde a traviés de la plataforma Zoom cola participación del autor, cunta col patrociniu de Nortes y de la Rede Renta Básica.
Daniel Raventós (Barcelona, 1958) ye doctor en Ciencies Económiques y profesor titular na Factultá d’Economía y Empresa de la Universidá de Barcelona. Escribió cuasi una docena de llibros y preside la Rede Renta Básica, que funciona dende va venti años como la sección nel Estáu español de la Basic Income Earth Network o Rede Global de Renta Básica, formada por investigadores y activistes que defenden la idea d’establecer un ingresu mínimu universal pa cada ciudadana o ciudadanu de la sociedá al marxe de que desarrolle o non una actividá llaboral.
Raventós ye autor tamién de dellos trabayos sobre teoría normativa republicana y coordinador de la revista sobre república y socialismu Sin Permiso, fundada en 2005.
