Mediu centenar de persones convocaes poles organizaciones y colectivos qu’apoyen Vía Campesina y la Campaña Asturiana pola Soberanía Alimentaria reuniéronse esta tarde soleyera de sábadu n’El Solarón pa festeyar el Día Internacional de les Lluches Campesines. Música de saxofón, cantares de pandereteres, una planta d’arbolinos y la presentación d’un llibru dieron conteníu a esti alcuentru col que remató’l programa d’actividaes culturales, informatives y medioambientales que se desarrollaron en Llangréu, Uviéu, Avilés y Xixón a lo llargo d’estos tres díes.
Abrió l’actu Miguel San Miguel, músicu y miembru del Comité de Solidaridá cola Causa Árabe, recitando la lletra y interpretando col saxófon la música del cantar xornaleru En la plaza de mi pueblo. Javier Arjona, de Soldepaz Pachakuti, garró’l micrófonu pa dicir que “tamos ocupando simbólicamente El Solarón pa reivindicar l’agricultura campesina, que se contrapón a l’agricultura industrial”. Recordó l’orixe del Día Internacional de les Lluches Campesines, que conmemora cada añu l’asesinatu de diecinueve campesinos del Movimento dos Trabalhadores Rurais Sem Terra (MST), lleváu a cau el 17 d’abril nel estáu brasileñu de Pará. “Eso, ente otres coses, convócanos güei equí”, esplicó.
Laura Ibarra Telenti, uvieína que cambio la ciudá pol campu va catorce años, presentó’l so llibru Diario de una campesina (Tierra de Sueños, 2021), nel que recueye les sos esperiencies como llabriega nel conceyu de L.lena, onde practica l’agricultura ecolóxica. L’autora señaló, nesta primer presentación que lleva a cau del llibru, que “yo siéntome campesina, soi humana, soi terrestre. Y una campesina aprovecha cada productu que tien pa sobrevivir”. Añadió que “el campesináu vive n’equilibriu cola naturaleza. El dineru nun forma parte del mio ideariu, pero ye una moneda de cambiu, porque nun m’enseñaron a vivir ensin él”.
Laura Ibarra lleó una páxina del so llibru y tuvo tamién un recuerdu pal MST brasileñu, al que pertenez “un montón de xente que reclama’l derechu a la tierra”. Tres de la presentación, el grupu de pandereteres feministes Nun Tamos Toes tocó y cantó dellos temes mientres un garrapiellu de neñes, neños y persones adultes plantaben y regaben dellos arbolinos n’El Solarón.
Va veinticinco años, na Cume Mundial de l’Alimentación celebrada en Roma na seronda de 1996, Vía Campesina presentó la so propuesta de soberanía alimentaria “pa oponese al destructivu modelu industrial capitalista que sigue causando fame, desigualdá y crisis climática”, denuncien los colectivos convocantes, qu’afirmen que “la respuesta de les organizaciones campesines de tol mundu xuníes en Vía Campesina ye la llucha pola soberanía alimentaria”.
