El colectivu de cultura y turismu Ser Asturianu entama pa los próximos díes, dientro del so ciclu de visites guiaes n’asturianu, una ruta pel Uviéu de la Revolución de 1934 y otra pel Xixón en guerra de 1937. La primer cita ye esti vienres, día 23, con salida na uvieína plaza d’El Fontán y la segunda, el sábadu 24, va tener como puntu de salida’l Teatru Jovellanos.
La ruta de Xixón va llevase a cau tamién los díes 30 d’abril y 8 de mayu, y la d’Uviéu va repetise los díes 1 y 8 de mayu, con salida a les siete de la tarde en tolos casos. Les inscripciones, a un preciu de diez euros, pueden facese mandando un corréu electrónicu a infoserasturianu@gmail.com o a traviés del númberu de teléfonu 626221712.
Ser Asturianu ufre nel casu del itinerariu uvieín, de dos hores de duración, “un viaxe a la Revolución d’Asturies de 1934, l’acontecimientu más importante que vivió Uviéu en tol sieglu XX. Una época marcada pol ascensu del socialismu y del facismu en mediu de la crisis de les democracies burgueses”. Les persones participantes van poder conocer “la última revolución obrera d’Europa occidental, onde la ‘Comuña Asturiana’ llegó a cariciar la idea d’una sociedá ensin clases, conquistando el poder políticu, tomando y ocupando decenes de cuarteles y bancos, y suprimiendo inclusive la moneda”.
La ruta xixonesa, d’una hora y media, ufre una “panorámica xeneral de la guerra civil na ciudá de Xixón, ente’l branu de 1936 y la cayida del Frente Norte n’ochobre de 1937”. El grupu va adentrase “pelos escenarios clave a lo llargo de la contienda, l’aniciu de los primeros combates, la sede del Conseyu Soberanu d’Asturies y Llión, la prisión provisional o los principales refuxos antiaéreos, averándomos a les secueles del asediu dempués de 15 meses de bombardeos sobre población civil”.
