La delegación saharaui n’Asturies denuncia “l’esperpentu” del Gobiernu marroquí pola estancia n’España de Brahim Gali

El presidente de la RASD viaxó pa recibir atención sanitaria

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

La representación n’Asturies de la República Árabe Saharaui Democrática (RASD) fizo públicu güei un comunicáu nel que denuncia “l’esperpentu montáu estos díes pol Gobiernu de Marruecos por mor de l’acoyida y tratamientu n’España de la enfermedá que padez el presidente de la RASD, Brahim Gali”. La delegación asturiana ve nesa actitú “un claru exemplu de la insensibilidá de la que ye capaz el réxime d’ocupación marroquí”, que “na so desesperación nun cesa na inútil ofensiva tendente a emporcar por tolos medios posibles al pueblu saharaui, al so llexítimu representante, el Frente Polisario, y la so xusta llucha pol exerciciu del derechu a la llibre determinación, la llibertá y la independencia, mesmamente naquello que se refier a cuestiones de calter humanitariu”.

Llamenta la delegación política n’Asturies del país magrebí que nesi intentu “de negación del pan y la sal al pueblu saharaui, el Ministeriu d’Asuntos Esteriores de Marruecos mesmamente se permitió la emisión y difusión d’un desesperáu comunicáu que, como ye habitual nel so proceder delante de cualesquier cuestión que-y cafia, ta atestáu de falsedaes y manipulaciones”. Añade qu’un réxime que quier presentase na comunidá internacional como “de calter democráticu nun puede intentar basar la so llexitimidá, y la continuidá de la so esistencia, na pretensión de xustificar les sos crisis y contradicciones internes na busca a cualesquier preciu d’un enemigu esternu” a traviés del “chantaxe y l’agresión”.

La representación asturiana del Polisario diz que “les violaciones masives y diaries de los derechos de la indefensa población saharaui por parte de les fuercies d’ocupación de Marruecos nel Sáhara Occidental constitúin una práctica habitual denunciada poles más prestixoses y importantes organizaciones internacionales de derechos humanos”. Fai referencia tamién a Pablo Ruz, xuez de l’Audiencia Nacional, na querella “contra once altos funcionarios marroquís del exércitu y la policía por intentu de xenocidiu nel Sáhara Occidental ente los años 1975 y 1992, amás de ser acusaos de delitos de detención illegal, tortura, asesinatu y desapaición forzosa”. Poro, diz, la comunidá internacional y sobre too la Unión Europea “tán obligaes, nel marcu de los acuerdos d’asociación billaterales relacionaos con esti tema, a poner fin a la continua impunidá del réxime marroquí en materia de violación de los derechos humanos”.

Recuerda que’l pasáu mes de payares l’exércitu del reinu alauí llevó a cau “la violación del altu’l fueu acordáu poles dos partes en 1991” al entrar en territoriu desmilitarizáu y protexíu pola Misión de les Naciones Xuníes pal Sáhara Occidental (MINURSO) col envís “d’agredir militarmente a manifestantes civiles saharauis” que taben protagonizando “una acción de protesta pacífica na zona denomada El Guerguerat”. L’oxetivu d’esa acción civil yera, esplica la representación saharaui n’Asturies, “bloquear el pasu de mercancíes, incluíes les provenientes del espoliu de los recursos naturales del Sáhara Occidental, hacia países del África subsahariana a traviés de la illegal brecha abierta pol Reinu de Marruecos na muria de separación”.

- Publicidad -spot_img

Actualidad

Dejar respuesta

Please enter your comment!
Please enter your name here