El Comité de Solidaridá cola Causa Árabe y la Coordinadora Asturiana d’Organizaciones non Gubernamentales pal Desarrollu (CODOPA) convoquen pa esti xueves, día 29, a les ocho de la tarde, una concentración na plaza del Institutu de Xixón pa esixir la puesta en llibertá de la trabayadora humanitaria Juana Ruiz, encarcelada por Israel. Güei y mañana van llevase a cau otres concentraciones en Madrid, Barcelona, Sevilla, Valladolid, Salamanca, San Sebastián, Pamplona y Santander.
Juana Ruiz Sánchez ye una ciudadana española que dende va 35 años vive en Palestina, onde trabaya como coordinadora de proyectos de la organización sanitaria palestina Health World Committees. (HWC). Esta trabayadora humanitaria de 63 años d’edá ta encarcelada pol Estáu d’Israel dende va quince díes y un tribunal militar decidió ayeri prollongar una selmana más la detención ensin cargos.
El día 13 una ventena de soldaos israelinos presentáronse en plena nueche na casa de la familia de Juana Ruiz, na localidá cisxordana de Beith Sahur, cerca de la ciudá de Belén, y lleváronla detenida. El pasáu 8 de marzu l’exércitu sionista allanó la oficina central de HWC, n’Al Bireh, detuvo al responsable del departamentu de contabilidá de la organización, Tayseer Abu Sharbak, y secuestró equipos informáticos y documentación sobre’l llabor humanitariu que HWC desarrolla en collaboración con delles organizaciones internacionales.
