Alredor d’un centenar de persones participaron esta tarde nel Paséu de Begoña na convocatoria de l’asociación cultural Caja de Músicos pa pidir la llegalización de la música en vivo en Xixón. Les músiques y músicos presentes na concentración cantaron, tocaron, desplegaron una pancarta cola lleenda Llegalización música Xixón y lleeron un comunicáu nel que ficieron un llamamientu a la movilización del sector y denunciaron “la incapacidá de les autoridaes competentes pa resolver esta situación”.
El colectivu recuerda que, amás de la prohibición vixente de tocar n’establecimientos hosteleros (que nun deriva de les midíes sociosanitaries del coronavirus sinon que ye anterior al andanciu), la sociedá municipal Divertia “dexó d’otorgar permisos pa tocar na cai” y llamenta que se dea una situación “que nos esclui, que nos criminaliza”. Piden al Gobiernu asturianu qu’autorice la música en locales d’hostelería y al Ayuntamientu que permita la música na cai.
L’actu comenzó cola interpretación de Chalaneru, A coyer el trébole y Nel pozu María Luisa a cargu d’una orquesta de vientu, cuerda y percusión. Tres la llectura del comunicáu intervinieron dellos grupos, músicos y cantantes, ente ellos el Coru Antifascista Al Altu la Lleva, qu’interpretó Muyeres de la clas obrera y Grândola, Vila Morena. Na concentración tuvieron presentes Laura Tuero y Juan Chaves, portavoz y conceyal, respectivamente, del grupu municipal Podemos Equo Xixón.
