Nel Amaro, tantes vides como un gatu

Teatru, poesía, novela, cuentu, poesía visual, arte por corréu y perfomance definen al autor mierense, protagonista d'esta Selmana de les Lletres

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

Teatru, poesía, novela, cuentu, poesía visual, arte por corréu, performance… A traviés de siete disciplines artístiques (quiciás dalguna más) buscó la forma d’interrelacionase col mundu, y nesi intentu vivió tantes vides como un gatu, que ye lo que reflexa’l títulu de l’antoloxía Pruebes d’autor. Les siete vides de Nel Amaro, coordinada por Xandru Fernández. Cúmplense 75 años del nacimientu y diez de la muerte de Nel Amaro, autor irrepetible de la xeneración lliteraria del Surdimientu, al que ta dedicada la Selmana de les Lletres Asturianes qu’empieza esti llunes.

Manuel Amaro Fernández Álvarez nació na Nuechebona de 1946, nun entornu mineru y antifranquista de l’aldea de Quentuserrón, a cinco kilómetros de Mieres del Camín, anque ellí pasó pocos años, porque en 1952 la familia marchó al barriu de Santa Marina, na capital del conceyu, onde Nel Amaro vivió hasta qu’en 1988 treslládose a Turón. So ma, Encarna, y so pá, César, yeren militantes comunistes na clandestinidá, y esi compromisu políticu mamáronlu Nel y tamién la hermana pequeña, Mari Luz, qu’acabó convirtiéndose nún de los símbolos de la llucha pola llibertá n’Asturies de los años caberos del franquismu. Mari Luz, que trabayaba como maestra en Madrid, fue una de les persones deteníes en 1974 tres l’estrañu atentáu na cafetería Rolando (un establecimientu de la capital d’España que taba a pocos metros de la Dirección Xeneral de Seguridá), nel qu’hebo trece víctimes mortales. Ella pasó cuasi tres años na cárcel madrilana de Yeserías, fue puesta en llibertá cola amnistía de 1977 y recibiéronla en Mieres con una pancarta que dicía: Mariluz, fixisti camín de llibertá pal pueblu d’Asturies. El propiu Nel Amaro, que yá tuviera encarcélau a mediaos de los años 60 pola so actividá antifranquista, pasó dellos meses na prisión madrilana de Carabanchel por mor d’aquel atentáu con esplosivos qu’en realidá fuera obra d’ETA político-militar.

El neñu Nel Amaro nel barriu mierense de Santa Marina. Foto Zapico

Al marxe de la represión que sufrió nes sos carnes, nun fueron fáciles les coses pa Nel Amaro nel tarrén llaboral. Dende neñu careció problemes de salú y eso peslló-y les puertes al oficiu de mineru, al que se dedicaron munchos de los sos familiares varones. Años más tarde trató esi asuntu, cola ironía que gastaba la so pluma lliteraria, nun pequeñu poema: Los mios güelos foron mineros / mineros foron los mios hermanos / y tamién foi mineru mio pá / que dexaron toos les sos vides / arrincando’l carbón. / Ye polo que camiento anguaño / qu’algún fallu hebo producise / nel mio códigu xenéticu / pa finar asina / escribiendo poemes.

Trabayó como carteru en Correos y Telégrafos hasta que perdió’l puestu, a mediaos de los años 70. Darréu empezó a ganar unes perres faciendo collaboraciones anónimes pa un periódicu. L’escritor y profesor mierense Xandru Fernández, coordinador de los actos d’esta Selmana de les Lletres, señala que “lo que lu saca de la probeza ye una anomalía institucional, la esistencia d’una rede d’instalaciones, les ‘cases de la mocedá’, pertenecientes a la estinta OJE y que, cola llegada de la democracia, en dalgunos casos municipalícense y n’otros, como’l de Turón, queden al somantu del Ministeriu de Cultura, primero, y de la Conseyería de Xuventú depués”. Dende esi momentu Nel Amaro compaxinó’l trabayu como bedel cola xera de profesor de teatru en talleres pa rapacines y rapacinos.

Na década de los 70 fundó fancines y revistes como Sapiens literario y Cuélebre literario, que “yá naquella dómina marcaben el calter innovador y reivindicativu de la so persona”, afirma Leticia González Menéndez, doctora n’Historia del Arte pola Universidá d’Uviéu. Considera que “Nel Amaro fue una d’eses personalidaes imprescindibles nes lletres y na vida sociopolítica de les últimes décadas del sieglu XX n’Asturies”. Alternó’l castellanu col asturianu como llingües de comunicación y de creación, pasó a formar parte del colectivu de recuperación y reivindicación llingüística Conceyu Bable.

Una de les creaciones visuales del artista.

Averóse al teatru aficionáu en Mieres como actor y director, y en 1978 escribió les primeres pieces: Antígona en capilla y Buffet-Tard, en castellanu, y Xénesis o alborá de la conciencia, puntu d’arranque del nuevu teatru n’asturianu, alloñáu del costumismu dominante nel xéneru. Xandru Fernández afirma nel llibru Pruebes d’autor. Les siete vides de Nel Amaro que la segunda metá de la década de los 80 y la primer de los 90 “son años d’esplendor creativu na mente de Nel Amaro. Ye cuando empieza a practicar el mail art, echando al buzón tarxetes y postales coles sos creaciones primero, después híbridos de dibuxu y collage, amás de cartafueyos con títulos diversos”. Xandru Fernández y Nel Amaro, qu’acabaron siendo amigos y compañeros nes lletres asturianes, conociéronse cuando esti últimu trabayaba como bedel nel Centru de la Mocedá de Turón: “Llantáu a la puerta d’aquel edificiu, con un puru na boca y aire de tar de pasu a nenguna parte, Nel nun yera solo’l bedel del centru, yera tamién un axitador cultural y un iconu pop a escala del valle mineru onde vivíemos”.

Amás del teatru, Nel Amaro cultivó abondo la poesía, na que s’estrenó en 1979 con Responsos laicos, y la narrativa, onde fizo la primer incursión cola novela Adiós, Dvorak, editada por Azucel en 1990. Esi mesmu añu vio la lluz una obra publicada pol Ayuntamientu de Mieres que, ente otres curiosidaes, ye’l poemariu col títulu más llargu de la historia de la poesía n’asturianu: Y , Marta B., qu’entoncies nun yeres, tampocu, l’Anna Karenina de les películes de Jean Luc Godard. N’apuestes como estes aprucía la ética y la estética rupturista, iconoclasta mesmamente, d’un autor que fuxía de les etiquetes convencionales en tolos xéneros que diba visitando.

Colos versos de Diariu d’un polizón (Ámbitu, 1990), Poemes de San Francisco (Editora del Norte, 1993) y Pruebes d’autor (Trabe, 1994), y la prosa de Novela ensin títulu (Azucel, 1990), L’últimu del pelotón (Editora del Norte, 1994) y ¡¡¡Falanxista!!! (Trabe, 1995), amás del llibru de cuentos Na borrina (Editora del Norte, 1993), entre otres obres, completó la década más granible na so producción lliteraria. Col cambiu de sieglu y de mileniu dedicó’l so esfuerciu creativu a otres manifestaciones artístiques y yá solo entregó a la imprenta la novela Entós, cuando ñevaba (Ámbitu, 2002) y Les manes en caxón (Trabe, 2003), que recueye tres pieces teatrales curties y dos monólogos. Siguió creando nel campu de la poesía visual, de la que fue ún de los pioneros n’Asturies, y a traviés del articulismu de prensa, los recitales de poesía, perfomance… Púnxo-y nome a sucesivos ‘colectivos unipersonales’ como Auxilios Mutuos SL, Espaciu Arte Escéntricu, Fundiziom Malevich, ONG Performers sin Fronteras o la Fundación Perruno-Situacionista ‘Lazslo Kovacs’, na que collaboraba’l so perru Pulgu.

L’artista y el so perru Pulgu, integrantes de la Fundación Perruno-Situacionista ‘Laszlo Kovacs’.

Nel Amaro morrió n’abril de 2011, con 65 años d’edá. Tenía previsto participar como pregoneru, en mayu, nel tradicional homenaxe al osu que mató al rei Favila qu’entama tolos años en Llueves (Cagues d’Onís) l’Atenéu Republicanu d’Asturies, como recordaba nel blog El Valle de Turón l’historiador mierense Ernesto Burgos, que-y propunxera lleer el pregón d’esa edición. “Amaro nunca llegó a Llueves, porque la mala suerte quixo qu’una complicación de la so diabetes matáralu’l 4 de abril. Enterráronlu con una bandera tricolor”, escribió Burgos, que dixo d’él que “autodefiníase como poeta visual/oxetual/esperimental, mail-artista, instalador, pintor y ‘accionista’ (eso que suelen llamar performer). Sicasí, si hai qu’escoyer un axetivu pa resumilo too, esi nun puede ser otru que’l de pioneru, tanto polos temes que trató como pola forma en que lo fizo”.

Antón García, director xeneral de Política Llingüística, ve en Nel Amaro a un “inquietu creador en busca permanente, impertinente y bonaz al mesmu tiempu, críticu y constructivu. Yera imprevisible y sorprendente. Tengo pa min que yera tímidu, pero nada descubro diciendo que tenía fuertes convicciones y una humanidá candial y cariñosa”. Destaca d’él “una xenerosidá ensin llende y un espíritu llibre y contradictoriu capaz de conxugar nel so santoral laicu xente tan dispar como Brecht, Cristo, Joplin, Kerouak, Hendrix, Bartók, Beckett, Otero, Antígona, Brel, Cortazar o Fernán-Coronas. Nel Amaro desbordaba enerxía. Por eso a lo llargo de la vida fundó y desfundó sinfinidá de publicaciones peles que pasó tola poesía asturiana”.

L’historiador del arte y productor cultural barcelonés Óscar Abril, que fue director artísticu de LABoral Centru d’Arte, comparte con Nortes ún de los sos recuerdos del escritor mierense: “Abro una de les cartes que Nel unvióme. Esta ye del 19 de xineru de 1999. Otru sieglu, otru mileniu, otru mundu. Nun hai sobre, l’aviesu d’ún de los folios y un poco de celu faen d’ello. El primer foliu ye la fotocopia d’un artículu sobre apropiacionismu del mesmu Nel nel que me cita a mi (y a Esther y a Hilario) y al mio trabayu, con un agregu manuscritu nel que m’unvia un abrazu. El segundu foliu ye otra fotocopia de la octaviella de la presentación d’Espacio Arte Excéntrico en Madrid con Abel. El tercer foliu amuésame un montaxe con una fotografía suya, encabezada cola siguiente sentencia: Digamos que me voy a Londres de fin de semana y allí me transformo en la galerista Lotta Hammer (algo tendrá que decir mi esposa). Rises, cómo non. Nel yera esto. Sentíu de comunidá y d’afectu. Inmediatez, inxeniu, complicidá. Compromisu políticu y artísticu, como partes de la mesma cosa. L’arte de conxugar la primer persona del singular siempre dende esi nosotros que somos. Esa suerte d’individuación a la que se refier Gilbert Simondon. Pura performatividá. Y, ensin dulda, p’aquellos que como yo veníemos de mariñes mediterránees, la encarnación de lo más amao de l’alma y de la historia asturiana. Viva Nel”.

Material que Nel Amaro unvió a Óscar Abril nuna carta en 1999. FOTO: Óscar Abril

Nesta Selmana de les Lletres Asturianes que lleva’l so nome van presentase dos esposiciones (nel Auditoriu Teodoro Cuesta de Mieres y na Llaboral de Xixón), un documental y dos llibros: Pruebes d’autor. Les siete vides de Nel Amaro y l’antoloxía lliteraria Esperté ensin patria pa dormir ensin pruyimientos de conciencia, con edición y prólogu a cargu de Xandru Fernández. Amás esti llunes, día 3, a les siete y media de la tarde, la compañía Producciones Nun Tris va facer nel Auditoriu Teodoro Cuesta de Mieres una llectura dramatizada d’Antígona, por exemplu, obra cola que Nel Amaro ganó’l Premiu de Teatru de l’Academia de la Llingua Asturiana en 1991. El premiu de teatru profesional n’asturianu y gallego-asturiano que concede la Conseyería de Cultura dende va cinco años lleva, xustamente, el nome de Nel Amaro. De les siete vides artístiques que consumió esti artista multidisciplinar y home comprometíu cola so sociedá y col so tiempu, la del teatru fue una de les más intenses, quiciás porque él tamién creía naquella máxima del gran actor y director italianu Vittorio Gassman: “El teatru nun se fai pa cuntar les coses sinón pa cambiales”.

Actualidad

Dejar respuesta

Please enter your comment!
Please enter your name here