L’axedrez políticu de la oficialidá

En llegando la oficialidá, habrá que falar muncho del modelu llingüísticu que se quier p’Asturies nel sistema educativu o nos medios de comunicación.

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Cuando unos cuantos miles de mozos con melenes salen a la cai en plenu franquismu, en 1976, y glayen pidiendo la oficialidá de la so llingua, son unos revolucionarios, unos idealistes, unos soñadores… …cuando esa mesma xente, 45 años más tarde, con munches canes y arrugues na cara y con unos númberos de manifestantes muncho mayores siguen pidiendo lo mesmo que pidíen en 1976 y pídenlo sobre la base del Artículu 3 de la yá conservadora Constitución de 1978, yá nun son unos revolucionarios, idealistes y soñadores; son el centru políticu del país, y el país xira, sabémoslo toos, alredor d’esi centru políticu.

El movimientu pola oficialidá nun tien nada de revolucionario: nun propón un repartu distintu del poder (nun ye independentista), nun propón un repartu distintu de la riqueza (nun ye d’esquierdes), nun propón un rol distintu pa los homes y les muyeres (nun ye feminista). Tampoco tien nada de conservador o d’anti-revolucionario: nun sostién el repartu del poder, de la riqueza o de los roles de xéneros. Ye, cenciellamente, una reivindicación política que se da al marxe de la política estructural. Quiciabes por eso, nun primer momentu, costó-y tantu al marxismu l’entendelu (agora yá non, por suerte). El movimientu pola oficialidá ye como la llingua en sí: bien tresversal. A él pertenecen independentistes y españolistes, revolucionarios d’esquierda y tradicionalistes de dereches, homes machistes y muyeres feministes, mozos revolucionarios y vieyos conservadores. Ye’l centru políticu y pása-y lo que-y pasa a la bandera d’Asturies (y nun-y pasa a la d’España) que ye de toos por igual. Obviamente, toos estos perfiles qu’acabo d’ennumberar nun tán presentes na mesma proporción: d’igual mou que’l conxuntu de la sociedá asturiana “tira más pa la esquierda”, pása-y lo mesmo al conxuntu del movimientu pola oficialidá, porque, a fin de cuentes, nun ye más qu’una amuesa más reducida de la mesma población.

¿Ónde s’asitien los partíos?

El ruxerrux pola oficialidá nun fixo más que medrar nes últimes décades. D’unos verdaderos “años de plomu” nos que la persecución al movimientu foi constante (¿Cuántes veces-yos pidiría’l DNI la policía a los activistes polos derechos llingüísticos na dómina d’Areces), pasemos a una dómina na que tol mundu ta pol asturianu y lu defende (sacantes la estrema derecha) y la mayoría de la xente ta pola oficialidá. Dende llueu, hai un cambiu xeneracional y de mentalidá: De cabezaleros acomplexaos nos que caltrió’l mantra franquista de que “falar asturianu yera falar mal” pasóse a una xeneración de políticos ensin complexos: De Javier Fernández y Vicente Álvarez Areces pasemos a Barbón, de Carrillo a Valledor y Ovidio Zapico y d’Álvarez Cascos a Adrián Pumares. Esti cambiu xeneracional, xunto cola constatación de que “l’asturianu nun morrió” como daquella s’anunciaba al altu la lleva y de qu’anguaño ocupa una posición central y bastante moderada nel alderique políticu, fixo que la clas política asturiana seya consciente de que nun pue siguir mirando pa otru llau otros cuarenta años.

“Hai un cambiu xeneracional y de mentalidá”

Los partíos d’esquierdes dende poco depués de qu’entrare’l PAS nes instituciones, foron los primeros en recoyer el relevu de la oficialidá. IU convirtióse, de tolos partíos parllamentarios, nel primeru en defender la oficialidá de la llingua. Nun ye raro: foi tamién el primer partíu en defender los drechos de los homosexuales, el drechu a albortar, la eutanasia… y munches otres coses que, como dixo una vez un politólogu que conozo: “ponles IU nel programa un añu, 10 años más tarde van nel del PSOE y 30 más tarde nel del PP”. Pa IU (y pa Podemos, agora que viró tovía más p’hacia eses posiciones) defender la oficialidá nun ye un movimientu estratéxicu o táuticu, ye cenciellamente defender la so propia natura política non-supremacista y igualitaria; poro, nesti casu tien bien poco de táutico la escoyeta.

La FSA-PSOE foi’l partíu que más sorprendió. De mano, pensóse que nun diba pasar d’una política declarativa, pero l’aición del Presidente d’Asturies, Adrián Barbón, confirmó que l’apueste pola oficialidá per parte de la FSA yera seria: espresiones n’asturianu, una conseyera de cultura del movimientu llingüísticu (anque con un plan bastante continuista) y un compromisu d’oficializar la llingua. ¿Qué lleva al PSOE a esto? Mui cenciello. D’una banda, el PSOE, frente a l’apaición de Podemos, precisa de marcar más el so calter modernu o progresista. ¿Qué meyor cosa que la oficialidá? Ye dalgo que tien un bon consensu social darrera, que ta bien visto en toles clases sociales y grupos d’eleutores (menos nos de la estrema derecha) y que-y puede permitir dar una imaxe moderna ensin alteriar les estructures de poder: la distribución desigual de la riqueza y l’arquiteutura centralista del estáu. N’otres pallabres, un cambiu grande, visible pero que nun enfada a naide y que, pa detrás, nun dexa de ser cumplir cola Constitución. ¿Va tiempu que la Constitución nun paecía moderna, eh? Pos cola Oficialidá va paecelo otra vuelta.

“Nel casu de Foro’l compromisu paez menos fuerte que nel del PSOE”

Foro ye l’otru partíu que cambió de postura hacia la oficialidá nes feches más recientes. Nel casu de Foro’l compromisu paez menos fuerte que nel del PSOE, más que nada porque primero taben nel “non”, depués tuvieron nel “sí”, depués volvieron al “non” y agora paez que volvieron al “sí”. El dir y volver tien el so aquel. Pasóse al “sí” depués d’una victoria autonómica con un discursu nel que nun se dexó de falar d’Asturies como “un país” y nel que s’acentuó lo asturiano. Depués volvióse al “non” cuando la semeya de la Plaza de Colón y cuando l’españolismu más ranciu algamó los niveles más altos dende 1975 polo menos (recordái les banderes d’España nos balcones) y facía falta amosar esa “unidá d’España” del únicu mou que saben facelo les dereches: paeciendo toos fotocopies de Madrid. Por fortuna, el tiempu políticu ye otru: Ciudadanos esbarrumba, Vox pasa de ser estrema derecha al fascismu a golpe de chats d’ex militares, amenaces con bales, rises y dalgún qu’otru saludu nazi y el PP, esnortiáu, compite con ellos en Madrid. Podríemos dicir que Foro nunca nun la viere tan gorda y apuesta claramente por esi votu del “centru derecha” (alias: la derecha non fascista, qu’habela haila) y mui probablemente la cayida de Ciudadanos y el xiru al centru derecha del Foro seyan les claves que vaigan desplicar la sobrevivencia d’esti proyeutu más allá de 2023. Amás, nun hai qu’escaecer que les reivindicaciones territoriales non nacionalistes tán a la orde del día: “Por Ávila” ye una coalición non-nacionalista que tien representación nes Cortes de Castiella y Llión y “Teruel Existe” tien presencia nel Congresu y nel Senáu con unes propuestes bien asemeyaes. L’espaciu pa que medre Foro ye grande.


Vox ta a la escontra de la oficialidá como ta a la escontra de la homosexualidá, l’albuertu, les comunidaes autónomes, la educación pública, los drechos humanos en xeneral y cuasi cualquier otru consensu democráticu. Nun hai sorpresa.

“Les reivindicaciones territoriales non nacionalistes tán a la orde del día”

PP, pel so llau, ta nuna situación estraña. Ven con más esmolecimientu al espaciu Vox qu’al espaciu Foro-Ciudadanos, polo que nun son a salir de les sos posiciones anti-oficialidá anque dacuando paez qu’hai tensiones dientro del partíu. Tamién, tienen un problema de coherencia cola so propia política en comunidaes autónomes como Valencia (onde gobernaron bien d’años falando valencianu) o Galicia (onde gobiernen con un discursu bien rexonalista y, pa detrás, en gallegu). En realidá, son el partíu al que menos-y interesa abrir un alderique sobre esti tema, sobre manera a nivel d’España, onde diba costa-yos más defender les sos contradicciones con cómo traten al gallegu en Galicia y al asturianu (y al propiu gallegu) n’Asturies. N’última instancia la so posición va depender si intenten engarrase pol “centru” col PSOE (por exemplu, si presenten un candidatu como Feijoo) o siguen intentando evitar la fuxida de votos a Vox.

El final d’esta hestoria, a nun ser qu’heba un xiru impredicible de guión, vamos velu nunos meses, cuando s’algame un consensu d’un modelu d’oficialidá y de política llingüística que consiga poner al asturianu como una llingua oficial más de les d’España. En llegando la oficialidá, habrá que falar muncho del modelu llingüísticu que se quier p’Asturies nel sistema educativu o nos medios de comunicación, que son los dos grandes preseos que tien la normalización del idioma. Mui probablemente, les diferencies ente unos partíos y otros van llevase a esti llugar y ye que, depués d’un estatutu nuevu cola oficialidá, va venir una llei d’usu y promoción que remplace a la llei 1/98 que tien yá nada menos que 23 añinos.

Actualidad

Dejar respuesta

Please enter your comment!
Please enter your name here