El grupu de Podemos-Equo Xixón va pidir nel plenu municipal del próximu miércoles que, aprovechando la recuperación turística del refuxu antiaéreu de Cimavilla, l’Ayuntamientu instale na so redolada un memorial en recuerdu de les víctimes de los bombardeos que sufrió Xixón na guerra civil. El primer ataque aereu tuvo llugar el 22 de xunetu de 1936, solo cuatro díes dempués del güelpe d’Estáu franquista, y la ciudá nun dexó de ser bombardiada pola aviación fascista hasta pocos díes enantes de la entrada nella de les tropes franquistes, el 21 d’ochobre de 1937.
El conceyal Juan Chaves señala que Xixón “foi una de les primeres ciudaes europees nes que la población sufrió un bombardéu indiscrimináu, col únicu oxetivu de causar el terror”. L’ataque aereu más sangrín tuvo llugar el 14 d’agostu de 1936, conocíu en Xixón como’l ‘vienres negru’; el médicu forense Honorio Manso “acreditó qu’esi día nel depósitu de cadabres había 91 persones fallecíes”, recuerda l’edil.
En 1937 la Lexón Cóndor nazi sumóse a esos bombardeos sobre la ciudá, que daquella tenía una población d’unes 60.000 persones. Miembros d’esa mesma lexón aerea desfilaron trunfalmente pel centru de Xixón n’abril de 1939, al acabar la guerra.
