La oficialidá del asturianu yá nun acepta más retrasu

El Gobiernu d'Adrián Barbón ha de cumplir la promesa d'oficializar esti idioma enantes de qu'acabe la llexislatura

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

La conseyera de Cultura, Política Llingüística y Turismu, Berta Piñán, anunció nuna entrevista en TPA qu’esta seronda va echar a andar el procesu parllamentariu y llexislativu qu’ha de convertir l’asturianu y el gallego-asturiano en llingües oficiales. El compromisu cola oficialidá del asturianu que tien Berta Piñán, una de les meyores escritores nesta llingua, ta fuera de cualesquier discutiniu. Sicasí a mi me chocó que rematara esi anunciu afirmando qu’ella tien confianza na pallabra d’Adrián Barbón; nun sé si yera una fórmula pa completar la frase o un recordatoriu al presidente asturianu de qu’hai que cumplir lo prometío…

La Federación Socialista Asturiana (FSA-PSOE) presentóse a les elecciones de 2019 col compromisu d’oficializar les dos llingües propies d’Asturies. La llexislatura ya superó l’ecuador, a la vuelta del branu va quedar malpenes un añu y mediu d’actividá parllamentaria. Hasta agora’l Gobiernu socialista xustificó esa tardanza en poner en marcha’l procesu d’oficialidá pol andanciu de la Covid. Nun hai muncho qu’oxetar a esi retrasu, les circunstancies quiciás podríen xustificalo, pero nengún andanciu va valir yá como pretestu a la vuelta d’esti branu pa dexar pa prau la oficialidá. Nesti país les y los falantes de les llingües propies d’Asturies llevamos más de cuarenta años esperando que se nos reconozan derechos llingüísticos fundamentales que yá tienen reconocíos cuantayá nos sos territorios les xentes que falen euskera, catalán, gallegu o aranés. Llevamos al llombu más de cuarenta años de represión, escaezu, nengunéu, escarniu… Y el vasu yá apinó, yá nun val siguir diciendo que la oficialidá tovía nun toca.

Bienveníu seya’l procesu d’oficialidá, si ye que vien a la vuelta del branu. Y si nun vien vamos salir a buscalu nes cais, que ye onde defendemos la dignidá d’esti idioma dende va más de cuarenta años. Que-y quede claro al Gobiernu d’Adrián Barbón.

Actualidad

2 Comentarios

Dejar respuesta

Please enter your comment!
Please enter your name here