El 24 d’agostu de 1937, en plena Guerra Civil, proclamábase’l Conseyu Soberanu d’Asturies y Llión. Esti domingu, un añu más, Andecha Astur quixo rindir homenaxe en Tarna a aquella declaración de soberanía per parte del so presidente, el socialista Belarmino Tomás, y los partíos del Frente Popular asturianu.
Conseyu Soberanu. Semeya: Constantino Suárez.
Dempués de la ufrienda floral énte’l monumentu que fai alcordanza d’esta hestórica declaración, tuvo llugar la intervención política. Corrió a cargu de Mariano Suárez, que tres faer un repasu a cómu “al traviés de los sieglos el Pueblu Asturianu vien declarándose Soberanu frente a Castiella primero y a España” valoró la situación d’anguañu “con un Principado y un estatutu impuestu dende Madrid y víctimes de la política española de desindustrialización y esfarrapamientu del texíu socioeconómicu y cultural d’Asturies”
Na so intervención Mariano Suárez destacó’l rixu del pueblu asturianu y la “viabilidá social y económica cola que cuntamos p’afitar el futuru colleutivu y el progresu social, destacando la necesidá de recuperar la soberanía que perdiemos pola fuercia les armes, como ferramienta imprescindible p’avanzar nun proyeutu común que permita superar la situación que carecemos anguañu y garantizar la superviviencia como pueblu y avanzar haza una sociedá más xusta ya igualitaria”.
Pa finar, perafitóse la reclamación de la República Asturiana como una “continuidá hestórica d’aquella declaración de 1937 y tamién y sobro too, como únicu sistema que garantiza la llibertá, democracia y progresu d’esti pueblu”.
