El Casinu de Llanes va acoyer esti vienres, a les siete de la tarde, la presentación de Fierro, carbón y metralla. Música y lletres pa una tarde ensin interné, un espectáculu lliterariu y musical promovíu pola editorial Hoja de Lata dientro del programa Asturies, Cultura en Rede y que lleven a escena dos creadores xixoneses: el músicu David Varela y l’escritor Paco Álvarez.
Daniel Álvarez, editor d’Hoja de Lata, desvela que Fierro, carbón y metralla ye una llectura musicada de fragmentos “de la meyor narrativa del escritor con una secuencia sonora creada ad hoc pol nomáu músicu”. Una escoyeta na qu’hai testos de la novela Lluvia d’agostu y del llibru de cuentos Pasaxeres de la nueche, asina como “rellatos premiaos en concursos de narración y adelantos d’obres inédites, dialogando con una propuesta musical na que lo mesmo suena un compás aceleráu de les Highlands col acordión qu’una añada suavina cola flauta trevesera enantes de volver a la carga con dalgún de los compases deprendíos por Varela en Lliberdón, La Bandina o La Bonturné”. L’editor esplica que la idea ye “atrapar al públicu, facelu caer nuna narración adictiva cola esbilla lliteraria que fae Álvarez, la banda sonora que pon Varela y l’ambientación de les imáxenes de fondu, que dirán sucediéndose al mesmu ritmu que la pallabra y la música”.
David Varela ta venceyáu a la música tradicional dende bien neñu. Ye multinstrumentista (tamboriteru, acordionista, flautista, cantante…), músicu d’acompañamientu de grupos de pop o de teatru y maestru d’acordión diatónicu, percusión tradicional, tambor asturianu y bodhram nes escueles de música tradicional La Quintana de Xixón y A Mansalva en Llaviana, y nes escueles municipales de música de Tinéu, Cangas y Nava, na que tamién foi director. El so nome aparez en mediu centenar de trabayos discográficos, con collaboraciones nacionales y internacionales en dellos xéneros y estilos.
Paco Álvarez ye escritor, traductor lliterariu d’italianu y periodista, oficiu nel que s’estrenó va trenta años nel diariu El Comercio y qu’anguaño exerce como redactor de Nortes. Escribió una decena de llibros de ficción y de non ficción, n’asturianu y en castellanu; ente ellos, les noveles Lluvia d’agostu (Hoja de Lata, 2016) y Los xardinos de la lluna (Trabe, 2020), coles que ganó’l Premiu Xosefa Xovellanos en dos ocasiones. La primera d’elles, inspirada na vida y muerte del anarcosindicalista Buenaventura Durruti, publicóse tamién en castellanu con Hoja de Lata y n’alemán col sellu vienés Bahoe Books.
Hoja de Lata ye una editorial fundada en 2013 pola barcelonesa Laura Sandoval y pol xixonés Daniel Álvarez que tien publicaos 75 títulos de narrativa y d’ensayu, repartíos en tres colecciones: Sensibles a las Letras, Mecanoclastia y Albentestate. Esti sellu yá ye un referente nel mercáu editorial asturianu y estatal, con presencia nos eventos llibreros más importantes (Sant Jordi en Barcelona, les feries del llibru de Frankfurt, Guadalajara, Madrid…) y atropa nel so catálogu autores de países tan diversos como Canadá, Palestina, Italia, Rusia, Estaos Xuníos, Islandia, Austria, Grecia, Bulgaria o Brasil.
