El Muséu del Pueblu d’Asturies, en Xixón, ye l’escenariu escoyíu pa tributa-y esti domingu, día 26, a partir de les doce y media del mediudía, un homenaxe que va xunir la música y la pallabra n’alcordanza de Yolanda González Huergo (1971-2020). L’actu entámalu la Xunta pola Defensa de la Llingua Asturiana, de la que yera una militante histórica, pero a él van sumase voces de dellos ámbitos de la política, la cultura y la sociedá xixonesa y asturiana.
Yolanda Huergo, llicenciada en Derechu, participó dende moza en milenta causes sociales, dende la de la Xunta pola Defensa de la Llingua Asturiana hasta la de sección asturiana d’Amnistía Internacional. Militó n’Unidá Nacionalista Asturiana, n’Izquierda Asturiana y en Podemos Asturies. Morrió n’agostu del añu pasáu dempués d’un llargu combate contra una enfermedá que nun fue quien a apartala de la militancia nin de la vida pública; hasta los díes caberos siguió exerciendo como conceyala portavoz del Grupu Municipal Podemos-Equo Xixón, la coalición electoral de la que fuera candidata a l’Alcaldía nes elecciones de mayu de 2019.
Por mor de les restricciones derivaes de l’andanciu, esplica la Xunta, “nun se pudo entamar primero esti actu de reconocimientu que quier reparar na persona, no qu’ella significó na defensa de la llingua asturiana, amás de nuna montonera más de causes nes que Yolanda participó a lo llargo de la so vida”. La xornada va ser, añade’l colectivu de reivindicación llingüística, “una mirada señaldosa a lo qu’ella foi, pero tamién una mirada al futuru enllena de tol compromisu qu’amosó Yolanda na so vida”.
Van pone-y música al homenaxe los grupos Felpeyu y L-R, “dos de los grupos de los que Yolanda disfrutó munches vegaes” y, añade la Xunta pola Defensa de la Llingua Asturiana, “tamién va haber voces que van falar d’aquello no que Yolanda invirtió munches hores, el compromisu coles coses nes que creía. Va falase de tol trabayu de Yolanda lluchando pola diginidá y oficialidá de la llingua asturiana, pero tamién del so llabor en defensa de los derechos humanos cuando militó n’Amnistia Internacional, o la xera en distintes organizaciones polítiques que la llevó nos últimos años a ser conceyal nel Ayuntamientu de Xixón por Podemos Asturies”.
