El ciclu de presentaciones de novedaes discográfiques Amosando llega a la so octava edición esti domingu 3 d’ochobre. A les 17.30h nel Toma3 de Xixón, van presentar los sos nuevos trabayos Fernando Valle Roso y Silvia Moreno con ‘Cantares de… y pa neñ@s’ y Llevólu’l Sumiciu con ‘Entaína’. Música pa la reciella y electrónica de raigañu pa da-y forma a esti ciclu entamáu por musicasturiana.com, con un formatu ente conciertu acústicu con aforu reducíu, programa de televisión y alderique.
“Cantares de… y pa neñ@s” ye’l proyectu musical conxuntu de Fernando Valle Roso y Silvia Moreno. Con él, reivindiquen les canciones tradicionales que per munchos años la reciella asturiana cantaba pa divertise y que nos últimos tiempos foron escaecíendose. Pa qu’estos sones espoxiguen dan esti conciertu didácticu y grabaron un discu homónimu nel que compilen y reinterpreten diez d’estes pieces populares.
Llevólu’l Sumiciu ye un proyectu musical y audiovisual que nació en 2020 p’amestar música asturiana y electrónica. ‘Entaína‘ ye’l so primer EP, un trabayu nel que la música del país renuévase y cantares de formaciones como Nuberu, D’Urria, Xaréu Folk o Grupu Trasgu suenen más actuales y mestizos gracies a la revisión que faen d’ellos fusionándolos con ritmos afrollatinos y electrónicos.
Vuelta del Amosando Selmanal
Per otru llau, el llunes 4 d’ochobre a les 21.30h van volver les emisiones del Amosando Selmanal. L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera y José Manuel Tejedor dan forma a estes emisiones de les que va dir publicándose un cantar tolos llunes a les 21.30h nel Facebook e InstagramTV de musicasturiana.com.
