Ñaz Asturianos, un colectivu al serviciu de “Asturies como entidá, como exa tresversal”

Asturies como realidá, dexando de llau’l partidismu, ye l’enfotu principal col que naz un conceyu de persones que se definen como asturianes, y por eso adopten como nome Asturianos, de saberes y esperiencies estremaes que quieren ponese al serviciu de cualisquier entidá que nagüe por afondar nel desendolcu d’esta tierra. Nel so puntu de mira inmediatu ta l’Estatutu d’Asturies y la so reforma.

Consideren perimportante que’l Gobiernu asturianu cunte con un conseyu de persones espertes, como ficieron otres comunidaes autónomes nel so procesu de reforma estatutaria. Apurren una riestra curiosa de conocencias rellacionaes con Asturies, que van dende la ordenación del territoriu (Xuan Pedrayes) a la xestión del agua (José Fernando Díaz, Pindy) o a la contaminación del aire (Manuel Iglesias), pasando pola comunicación (Sonia Avellaneda, Antonio Virgili o Chema Vega), la cultura (Mari Luz Cristóbal Caunedo, Marta Fermín y Pablo Armesto, ente otros), la música (Ramón Prada), el mundu empresarial (Inaciu Iglesias y Frankie Delgado), la llingua (Xuan Santori, Milio Rodríguez Cueto), la mitoloxía y etnografía (Alberto Álvarez Peña) o los deportes tradicionales (José Álvarez, Pola), ente otres disciplines.

Quieren dexar claro que detrás d’esti conceyu nun hai una ideoloxía o estratexa que correspuenda a nenguna formación política, sinon qu’Asturies “como entidá, como exa tresversal”, ye l’oxetivu real: busquen soluciones y la unidá delantre de les engarradielles que faen que caún tire pal so llau. Asturianos atropa persones d’estremaes tendencies polítiques, o apolítiques, baxo’l paragües d’esti proyectu que’l pasáu 20 de setiembre aprobó el so manifiestu y los sos oxetivos nel Centru Cultural de San Xuan de Capistrano, en Villaviciosa.

Asina definieron y aprobaron los oxetivos de la plataforma, razonaos na presentación por Xuan Pedrayes, ente los que tán camudar la sociedá pa meyorar el capital social d’Asturies, a la que consideren “allancada, poco dinámica y que necesita un propósitu d’enmienda pa tomar soluciones rápido”. En pallabres del propiu Pedrayes, el primer problema d’esta tierra “son los propios asturianos” pola mentalidá negativa, na so opinión.

“N’Asturies fáense munches coses bien, pero nin los propios asturianos sabémoslo, y tenemos que xenerar opinión independientemente d’ideoloxíes y crítiques”, dixo. Destacó tamién la necesidá de “xenerar una nueva economía asturiana, o nacionaliega, competitiva, onde Asturies mire al Atlánticu. Formamos parte de la exe cantábrica, tenemos otra forma de ser, miramos pa la mar, y dalgo que lo exemplifica agora mesmo ye la postura respecto a la protección del llobu”. Pedrayes faló de la necesidá de construir un territoriu equilibráu, “corrixendo la dixebra ente aldea y ciudá”.

Un puntu perimportante ye la educación y los sos conteníos “pa crear mano d’obra cualificada y adaptada a les necesidaes del mercáu”, y criticó la falta de cultura d’esfuerzu y el fechu de tener una Alministración sobredimensionada y poco eficaz y eficiente. Pa too esto, destacó, hai que definir una estratexa a mediu y cortiu plazu y “nun hai nin un partíu políticu n’Asturies que la tenga”.

Esti arquitectu, que nun tien priesa de xubilase a los sos 62 años, remarcó que “la sociedá nun ye tan sectaria como lo ye la política, o los partíos políticos”. D’ehí la necesidá de crear otros espacios de confluencia, nos que “aquellos que piensen diferente nun seyan enemigos”.

¿Y quién ye asturiana o asturianu? “Yes tanto d’onde ñaces como d’onde paces”, aclarió José Ramón García Monchu’l cura. En xeneral, ye’l sentimientu tresversal del conceptu asturianismu, “nin aldeanu nin metropolitanu”, comenta Pedrayes. Porque “un asturianu ye un asturianu; un asturianista pue ser ún d’Andalucía al que-y guste muncho lo asturiano, igual que nel casu d’un hispanista”, afirmó’l sacerdote, que se confesó creyente de “un cristianismu de tradición celta, en comuña cola naturaleza, non del cristianismu llatinu de la Ilesia oficial”. Al mesmu tiempu criticó qu’abondos políticos “rixen el destín de territorios nos que nun creen, sinon que busquen saltar a Madrid como ministros”.

Chema Vega, pela so parte, concluyó que “la política asturiana nun ye tresversal, pero los problemes que tien Asturies sí son tresversales y nós, dende Asturianos, enfotámonos en ser tresversales”. Asturianos pretende definir un nuevu ethos, una ética, unos usos y costumes, una manera de tar nel mundu.