Axuntase va celebrar esta fin de selmana un alcuentru en Llastres nel que van participar, xunto coles persones de la cooperativa, toes les qu’amosaron interés n’axuntase al proyeutu de cohousing. Una cita que va permitir averar el complexu de viviendes collaboratives que va llevantase en Caraviés (Llanera) a toes aquelles families que pidieren información p’axuntase a la iniciativa. L’alcuentru celébrase nun momentu en que la tramitación alministrativa ta yá peravanzada.
Esta mañana, la direutiva d’Axuntase y los arquiteutos del estudiu uviéin F1 aconceyaron col alcalde de Llanera, Gerardo Sanz, y l’equipu téunicu del Ayuntamientu. Nesta cita pudo constatase que les xestiones van per bon camín y que s’espera que les obres puedan entamar primero de qu’acabe l’añu.
A lo llargo de la fin de selmana van facese dellos talleres que van permitir trabayar na cohesión del grupu humanu que va mudase a Caraviés n’acabando les obres del complexu de viviendes colaboratives. Esti tipu d’actividaes permiten dir xenerando bones rellaciones ente la xente qu’integra la cooperativa, que nunos veses va tar conviviendo colos vecinos de Llanera.
El primer cohousing interxeneracional
La Cooperativa Axuntase ye la promotora del primer cohousing d’Asturies. El cohousing ye un modelu de vivienda nel que los integrantes disfruten d’una vivienda privada nun complexu arquiteutónicu que cuenta con espacios comunes amplios qu’afalen la socialización y la vida en comunidá. Esti modelu vien desendolcándose con gran ésitu nel centru y norte d’Europa, sobre manera de los años 70 p’acá y fai frente con decisión a problemátiques qu’afeuten a la sociedá nel so conxuntu como son: la sostenibilidá mediuambiental, l’accesu a la vivienda, los cocuidaos, l’equilibru trabayu-casa, etc. En definitiva, una vida saludable.
