Les Xornaes Nacionales de Podcasting (XPOD), qu’esti añu celebren la XV edición, van desendolcase en Xixón los próximos 12, 13 y 14 de payares. Tán organizaes pola Asociación Asturiana de Podcast, que dirixe’l periodista David Remartínez, y van trayer cientos de persones a la ciudá. A lo llargo de la fin de selmana van abordase temes como la monetización, les posibilidaes del formatu pa la prensa o’l futuru del sector. Too ello cola participación de grandes figures como Javier Aznar (Hotel Jorge Juan), Silvia Cruz Lapeña (El País Audio), Jacobo Pedraza (Newtral) y Carola Solé (Salvados).
Les XPOD van abordar la situación del podcast n’España, tanto l’amateur como’l profesional, dende munches perspeutives. Va haber presentaciones de grandes producciones, exemplos de proyeutos colaborativos fechos nel andanciu de la Covid, podcast científicos y educativos, y alderiques sobre asuntos relevantes como la monetización, l’apaición de plataformes de toa triba o l’allugamientu de conteníos. Una serie de temes que van tratase col sofitu d’espertos como Eva Correa, de VoiceUp, José Antonio Gelado, de Podimo, o Juan Ignacio Solera d’Ivoox.
A lo llargo de les xornaes va producise la entrega de premios de l’Asociación Podcast, que va aprovechar la ocasión pa celebrar el conceyu de los sos socios. Amás, van ufiertase a los asistentes, pa compartir y ampliar conocimientos, talleres de formación en creación de podcast.
Otra de les actividaes de les XPOD foi siempre la grabación de podcast en direuto. Y nesta edición, Llaboral Ciudá de la Cultura va convertise nel estudiu de los programes Órbita friki, El podcast de Carmen Osorio, Viajo en moto y ¡A la Velocidad Absurda!
Les XPOD2020 cuenten col patrociniu de la empresa pública Xixón Impulsa y a lo llargo de les estremaes conferencies y meses redondes, por mor de la llegada de persones d’otres zones, va promocionase Asturies como destín turísticu y van destacase les sos posibilidaes gastronómiques, pa los viaxes deportivos o como llugar de vacaciones.
La inauguración de les xornaes, que cuentan cola axencia especializada VoiceUp, les plataformes Ivoox y Podimo como patrocinadores principales y el sofitu de Xixón Convention Bureau, va tener llugar el vienres 12 pela tarde, y Xixón va convertise dende esi momentu hasta’l domingu 15 de payares na capital nacional del podcast. Al actu d’apertura van acudir l’alcaldesa de Xixón, Ana González, y el Direutor Xeneral d’Innovación, Investigación y Tresformación Dixital, iván Aitor Lucas del Amo.
