Chiara Mastroianni recoyerá en Xixón el premiu d’honor del FICX

Tamién galardonaos Gonzalo Suárez con el Premiu Isaac del Rivero, y Iciar Bollain con el Muyer de Cine 2021.

Recomendados

Nicolás Bardio
Nicolás Bardio
Es politólogo, escritor y creador de juegos de rol.

El Premiu d’Honor FICX 2021 va recayer na actriz Chiara Mastroianni (París, 1972) pola so carrera brillante y en celebración de los sos llogros pasaos, presentes y futuros.

Algamandó’l premiu a la meyor interpretación nel Festival de Cannes de 2019 pol so papel en Chambre 212. Premiada en Locarno en 2010 y dos vegaes nominada a los Premios César. Chiara Mastroianni convirtióse nuna de les actrices más valoraes pol públicu y la crítica internacional contemporáneos.

Podría afirmase que’l so talentu tien parte de caráuter innatu, pos ye la fía de l’actriz Catherine Deneuve y del actor Marcello Mastroianni, dos figures clave na historia del cine, anque consolidó una trayeutoria artística llabrada y sólida dende la década de los 90. A la elegancia y natural y delicadeza interpretativa que tien súmase-y la bona escoyeta de los personaxes qu’encarna.

“Podría afirmase que’l so talentu tien parte de caráuter innatu, pos ye la fía de l’actriz Catherine Deneuve y del actor Marcello Mastroianni”

Na so filmografía cuenta con más de cuarenta películes. Comenzó la so andadura profesional col llargumetraxe Ma saison préférée (1993) d’André Téchiné, nel qu’actuó xunto a la madre. La interpretación valió-y una nominación a meyor actriz revelación nos Premios César. D’entós p’acá foi conquistando con persistencia un sobresaliente reconocimientu pol so trabayu, a les ordenes de directores como Manoel de Oliveira, Robert Altman, Arnaud Desplechin, Claire Denis, Gregg Araki, Mike Figgis, Benoît Jacquot o Christophe Honoré.

Chambre 212

Mastroianni ta agora somorguiada na filmación d’Eureka, la nueva película de Lisandro Alonso, parcialmente rodada n’España. El direutor arxentín va acompañar a Chiara Mastroianni nun alcuentru especial col públicu del Festival. L’actriz va recibir el Premiu d’honor nel actu de llectura del palmarés del 59 FICX, el 27 de payares, nel Teatru Xovellanos.

Gonzalo Suárez, Premiu Isaac del Rivero

El FICX da-y el II Premio Isaac del Rivero a Gonzalo Suárez, en collaboración con Filmoteca Española y en reconocimientu a la so trayeutoria creativa. Una trayeutoria que lu asitia como figura única a nivel artísticu tanto polos llogros nos campos de la escritura y el cine, como pola forma en que la so obra foi redefiniéndose a lo llargo del tiempu como una de les más felizmente heterodoxes, prestosamente intempestives y rotundamente personales de les últimes décades. Una obra que sigue medrando, más viva y inquieta que nunca.

Suárez nació n’Uviéu, en 1934. La so familia treslládase a Madrid en 1936, u los sorpende la Guerra Civil. Estudia Filosofía y Lletres. La so primera ocupación foi’l periodismu, n’especial el deportivu, n’El Noticiario Universal. Entamó nel cine con Ditirambo (1967). Foi precursor de la llamada Escuela de Barcelona. Ente los sos títulos destaquen La Regenta, Epílogo, Don Juan en los infiernos, Remando al viento El detective y la muerte. Punxo delantre de la cámara a Charo López, Lex Barker, Ana Belén, Víctor Manuel, José Sacristán, Fernando Fernán Gómez, José Luis Gómez, Paco Rabal, Victoria Abril, Hugh Grant, Fernando Guillén, Maribel Verdú, Ana Álvarez o Carmelo Gómez, ún de los sos actores preferíos.

Remando al viento

Cola so carrera cinematográfica Gonzalo Suárez algamó un Premiu Goya y un total de cinco nominaciones, arriendes de gallardones en Cannes (Epílogo), Concha de Plata al meyor direutor nel Festival de San Sebastián (Remando al viento), el Premiu Luis Buñuel por La Regenta y el premiu honoríficu de Sitges. Amás, el cineasta asturianu ye Premiu Nacional de Cinematografía (1991), Medaya d’Oru al Méritu de les Belles Artes (1990), Caballeru de les Artes y les Lletres (Francia) y Medaya de Plata del Principáu d’Asturies.

En 1963, Isaac del Rivero creó la Amuesa de Cine pa la Infancia y la Mocedá, una ventana abierta, hasta esi momentu inédita nel nuesu país. El FICX instauró en 2019 un premiu que lleva’l so nome, y que reconoz la trayeutoria artística de profesionales venceyaos a Asturies. La primer edición entregóse-y al actor Javier Gutiérrez y tres el paréntesis de la edición pasada por mor de l’andanciu, Gonzalo Suárez va recibir el premiu nel actu d’inauguración de la 59 edición el próximu 19 de payares.

El cine de Suárez va tar presente nel 59 FICX per partida doble: con Don Juan en los infiernos, libre adaptación del Don Juan de Molière que-y valió’l Goya al meyor actor a Fernando Guillén, y col so nuevu curtiumetraxe d’animación Alas de tiniebla, coles voces de Charo López, José Sacristán y Ana Álvarez.

Icíar Bollaín, Premiu Muyer de Cine 2021

El premiu Muyer de Cine va entregase nel FICX a la direutora, guionista y actriz Icíar Bollaín (Madrid, 1967) na so edición de 2021. Desque entamare como direutora en 1995 con Hola, ¿estás sola?, Bollaín llogró que les sos películes tengan marca propia, reivindicando causes xustes al traviés d’histories feministes y militantes, como  Te doy mis ojos, También la lluvia, Flores de otro mundo y, la más nueva, Maixabel.

Empezó la so carrera nel cine como actriz con El sur de Víctor Erice. Depués trabayó a les órdenes de Ken Loach, José Luis Borau, Manuel Gutiérrez Aragón, Chus Gutiérrez y Felipe Vega, ente otros cineastes.

Iciar Bollain

El trabayu d’Icíar Bollaín como direutora y guionista recompensáronlu dos Goyes d’un total d’once nominaciones, amás de reconocimientos en Cannes, Berlín, Guadalajara, Toulouse, Málaga y Valladolid, ente otros festivales internacionales. Tamién en Xixón se-y concedió ex aequo cola so hermana Marina el gallardón a la meyor actriz por Dime una mentira (1992).

Los últimos premios recoyólos esti mesmu añu en San Sebastián por Maixabel, onde se-y reconoció la forma de narrar esi “viaxe d’alcuentru, escucha y reparación” que foron los aconceyamientos ente la viuda de Juan Mari Jáuregui y el miembru d’ETA que participó nel asesinatu del so home. Maixabel ta incluyida nos Pases Especiales del FICX, proyeición amadrinada pola Tertulia Feminista Les Comadres y la Direición Xeneral d’Igualdá de Muyeres y Homes de Gijón/Xixón. Esta proyeición va tener llugar el sábadu 20 de payares nel Teatru Xovellanos, y primero se-y dará’l Premiu Muyer de Cine 2021 a Icíar Bollaín.

Rodaxe de “La boda de Rosa”: Iciar Bollain, Sergi López y Candela Peña.

Esti premiu, creáu en 2011 por Muyeres de Cine (espaciu de reivindicación y referencia del cine español fecho por muyeres www.mujeresdecine.com), tien como oxetivu destacar la importancia d’aquelles cineastes qu’abrieron camín, al empar d’esparder y visibilizar el trabayu de la muyer na industria cinematográfica del nuesu país. Icíar Bollaín xúntase asina a les realizadores y guionistes Josefina Molina, Cecilia Bartolomé y Isabel Coixet; la figurinista Yvonne Blake; la montadora Carmen Frías; la representante Katrina Bayonas; l’actriz Mercedes Sampietro y les productores Cristina Huete, Esther García y Marisol Carnicero, que tamién va visitar Gijón/Xixón pa ceder el testigu del Premiu Muyer de Cine a Bollaín.

Amás de sofitar la entrega añal del Premiu Muyer de Cine, la Direición Xeneral d’Igualdá de Muyeres y Homes de Gijón/Xixón participa de forma activa en delles actividaes del 59 FICX, dende’l focu dedicáu a la cineasta francesa Sandrine Veysset hasta charres con Anisia Uzeyman (Neptune Frost) y Sofía Jallinsky (Palestra), y sofita’l Premiu CIMA (Asociación de muyeres cineastes y de medios audiovisuales). Igualdá de Gijón/Xixón caltién una rellación intensa col Festivan dende va años, collaborando n’estremaos programes y aiciones tresversales col envís de desaniciart toles discriminaciones por mor del xéneru. D’esti mou, ,la Direición Xeneral collaboró en seiciones competitives como la Seleición Oficial, y en Pases Especiales, Esbilla y Focos, amás de n’Aula FICX y actividaes complementaries.

Actualidad

Dejar respuesta

Please enter your comment!
Please enter your name here