Por primer vez n’años, el golor al entrar nel Calatrava yera por dalgo bonu, polos casi 4100 quesos qu’enllenaron el carru del centollu más famosu del país y non namás pola naftalina que va dexando Canteli al so pasu. Los World Cheese Awards amiyaron a Uviéu pa facer d’Asturies la capital mundial de los quesos mientres 3 díes y mediu.
3 díes y mediu de conceyos, charres, prebes de quesos, nervios por saber los ganadores, lluvia, munchu trasiegu y quesos a esgaya. Paez que les sensaciones foron bones, los queseros vendieron toles esistencies, el públicu respondió con más de 13.000 asistentes, los políticos sacaron la semeya y los ellaboradores foriatos ablucaron con Asturies y los sos quesos. Prestaba enforma ver a queseros de paises estremaos faciéndose entender falando de los sos problemes y cómo solucionalos, ver a distribuidores de tolos puntos del mundiu preguntar por quesos asturianos, ver a queseros noruegos allucinaos en viendo la mayanza nun llagar de sidra, o a cabezaleros queseros visitando cueves de Gamonéu.
Poner en valor el mediu rural y los productos artesanos. Ver cómo una quesería pequeña de Jaén, con xente mozo y formao, gana a grandes corporaciones. Ver cómo un Afuega’l Pitu de Gráu queda entre los meyores quesos del mundiu, cómo al frente d’ellos hai muyeres, moces y formaes. Y sentir arguyu de qu’una Asturies rural ye posible, magar los pilancos dende los despachos, onde la industria agroalimentaria sía un pegoyu indispensable pa la nuesa economía y pa fixar la so población.
Asturies ye’l “país de los 329 quesos”, “la mancha quesera más grande d’Europa nun territoriu tan pequeñu”. Sabemos arqueolóxicamente de la esistencia de quesos n’Asturies castreña na Edá de Fierru. Pero voi a los restoranes y casique nun atopo quesos asturianos. Por mor d’esti festival preguntábame una distribuidora madrilana onde comer n’Asturies con una bona esbilla de quesos asturianos, y costome axuntar 15 sitios.
Necesitamos más cultura quesera, que l’alumnáu deprenda nunca quesería d’au vien un quesu, qu’esistan unos estudios serios al rodiu del quesu (y la sidra) n’Asturies pa profesionalizar el sector y too’l sofitu pa echar a rodar esa economía llocal y sostenible de la que tanto falen, qu’empieza por conocer los productos de la nuesa redolada y consumilos. ¿Queréis lluchar escontra la buelga ecolóxica? Consume llocal. ¿Queréis futuru p’Asturies? Consume quesos asturianos
