El próximu 4 d’avientu a les 19h00 nel CMI d’El Llano va presentase’l monólogu “No solo duelen los golpes” de Pamela Palenciano que cuenta lo que-y pasó na so primer rellación de pareya faciendo que los espectadores garren conciencia de les violencies machistes que puen ser, dacuando, difíciles de ver a primer vista. Esti monólogu autobiográficu va presentando, al empar del so propiu desendolcu, la hestoria universal de les violencies machistes y la construcción d’estereotipos que xeneren desigualdá, permitiéndo-yos exercer la violencia sobre otra persona.
Pamela Palenciano ye bien conocida pente’l movimientu feminista por esti monólogu que vien interpretando en delles ciudaes de la xeografía española. Va poco foi l’oxetivu de les crítiques y l’acosu del partíu d’estrema derecha Vox, que criticaba’l conteníu d’estes charres y monólogos como lo que los ultres quieren censurar de les aules per aciu del “pin parental”.
El monólogu “No solo duelen los golpes” critica’l modelu d´”amor románticu”. Amás, l’artista organiza un taller de teatru pa la mocedá na propia sé del Conseyu de la Mocedá de Xixón al meudía del 4 d’avientu.
