Pues a mi gustaríame que los ‘adrianes’ me metan la llingua hasta’l fondu

El partíu fascista Vox, un rutíu ruidosu y fediondu post mortem de Francisco Franco (los cadabres siguen soltando gases contaminantes dempués de muertos), ta estos díes entreteníu con otra de les sos campañes de valles publicitaries. Nella representen a Adrián Barbón, presidente del Gobiernu asturianu, y a Adrián Pumares, diputáu de Foro Asturias (el partíu llámase asina, en coherencia cola llinia que ta defendiendo últimamente seique habría de presentase a les proximes elecciones como Foru Asturies), compartiendo un besu na boca. Supongo que con esta imaxe los ideólogos onanistes de Vox empezaron a machacásela a escondíes, col ciliciu del Opus Dei apretáu na cintura, hasta que-se yos ocurrió un eslogan pimpanu: Los ‘adrianes’ quieren meteme la llingua.

Dempués se monta un espolín bien gordu con esti tema y Ignacio Blanco, el portavoz del partíu fascista nel Parlamentu asturianu (nun parlamentu nel que, mes a mes, dende va dos años y mediu, esti personaxe parasitariu cobra ‘relixosamente’ a pesar de que’l partíu fascista nun cree nes autonomíes), quiciás cai na cuenta de que se-yos fue un pocoñín la pinza entemeciendo homofobia y llinguafobia na mesma cagada política, asina que fai como que quier recular nesi asuntu con un tuit patéticu nel que convida a que’l so electoráu faiga una foto delantre de dalguna de les pacartes. “Demuestra que dos diputados besándose no pueden molestar a nadie. Saca una foto frente a los Adrianes y etiquétanos”, diz.

Hai dos coses que tán bien clares, según el mio puntu de vista: qu’esa gandaya tien ganes de revolver y d’enmierdar el piteru pa tentar de robanos un derechu humanu, el derechu a vivir la vida y a interpretar el mundu nesti idioma, y que quienes tamos delantre d’ellos tenemos que defender el derechu, el patrimoniu, la hestoria y la memoria que representa esti idioma. Y too ello pasa pola oficialidá y la oficialidá agora mesmo pasa por defender, con uñes y dientes, a Adrián Barbón, a Adrián Pumares y al restu de diputaes y diputaos dispuestos a llevar alantre la reforma del Estatutu d’Asturies.

A mi gustáriame que me metieran la llingua hasta’l fondu los adrianes o cualquier de los parllamentarios y parllamentaries que tán defendiendo na Xunta Xeneral la oficialidá. De xuru qu’en caún d’esos besos con llingua atoparía arumes y matices d’esta tierra, mientres que na boca de les dereches que quieren apodrecer, envelenar y silenciar esti procesu solo hai eso: podrén, velenu y silenciu.