Inspiraos nel testu de Weber “La ética protestante y l’espíritu del capitalismu“, l’asociación ASTURIANOS nagua por ser un noyu de pensamientu y alderique que pueda poner les blimes pa un nuevu asturianismu. Nel so testu fai un énfasis especial nun cambiu d’ética n’Asturies y defende una serie de valores que podríen clasificase como “protestantes” o “capitalistes”, como la competitividá, el valor del trabayu y un refugu a midíes sociales d’izquierdes como’l salariu social que considera una “sopa boba” o’l “hippismu educativu” y “l’aprobáu xeneral”.
ASTURIANOS nun tien rellación con nengún partíu políticu y busca ser una ferramienta tresversal a la hora de tresformar Asturies. Pa ello parten d’un análisis de la realidá asturiana y d’una crítica importante a les polítiques de desendolcu del turismu que vinieron desendolcándose nos últimos años o a los gobiernos de la FSA-PSOE que consideren “peronismu”.
Tamién, amás de les crítiques, ASTURIANOS propón bien de propuestes de desendolcu económicu. Por exemplu, defenden la creación d’una lliga de ciudaes atlántiques na que’l puertu d’El Musel habría tener un llugar destacáu, y falen de la esistencia d’una exa industrial y poblacional nel cantábricu español que consideren una “ciudá llinial cantábrica” na qu’Asturies ocuparía una “posición central”. Arriendes d’esto, ASTURIANOS defende la igualdá d’oportunidaes ente les ciudaes y les aldees d’Asturies y critica tanto’l plan del suroccidente como la idea de facer un área metropolitana asturiana, que consideren un bluf.
Definen l’asturianismu como un “sentimientu tresversal nin d’izquierdes nin de dereches. Nin aldeanu nin metropolitanu” que puede buscar “caltriar nes oligarquíes polítiques y nos medios de comunicación”. Tal paez que, amás d’una busca por enantar les bases, la organización apostare pol Lobby como una de les ferramientes polítiques p’actuar. Amás, anecien na necesidá d’entamar “una estratexa con oxetivos y plazos” dalgo que consideren que nun tuvo nunca nel ideariu de les élites polítiques d’Asturies de les que ponen como exemplu de mala planificación la descarbonización acelerada, o’l marafundiu de los fondos mineros. Énte eso, ASTURIANOS busca afitar lo qu’ellos llamen una “utopía pragmática p’Asturies”. Esti ye el so manifiesto fundacional:
ASTURIANOS
UNA NUEVA ÉTICA P’ASTURIES
Más allá de tar domiciliaos, exercer la profesión y tener la condición alministrativa n’Asturies, pescaciaremos por asturianos y asturianes a aquelles persones que se sienten identificaes col ethos astur.
Ethos ye un términu griegu que significa’l llugar onde s’habita y la forma común de vida propia d’un país. Lo ético son los vezos, costumes, maneres de conducta recta y apropiada y tamién les instituciones que les abelluguen.
Asturies ye’l llugar y la herencia material e inmaterial que mos legaren los que nos precedieren, que nosotros asturianos queremos conocer y preservar, disfrutar, promocionar y tresmitir como fonte de creatividá y bienestar nel espaciu xeográficu y humanu onde queremos vivir y trabayar como comunidá.
Por tantu nada de cuantu se refiera a Asturies y a los asturianos debe senos estraño, lo mesmo nes ales que nel centro, na montaña o la mar, na aldea, les villes y la ciudá, incluyíos los asturianos y asturianes la diáspora.
La humanidá encadármase en biotopos, espacios onde viven les comunidaes humanes. Una sociedá con puxu desendolca a los sos homes y muyeres, y una sociedá simplaya allanca y morre. Tenemos que meyorar la ecoloxía humana d’Asturies. Tamién ye una cuestión de biodiversidá.
L’asturianismu ye la meyor perspeutiva pa esta encruciyada de cambios fondos onde mos atopamos. Ye un sentimiento tresversal, nin d’izquierdes nin de dereches. Nin aldeanu nin metropolitanu. Y dende esta perspeutiva puede llegase a caltriar les oligarquíes polítiques y los medios de comunicación.
Por tantu, iguar un báramu d’opinión apetiguñáu y activu resulta totalmente imprescindible nestos momentos. Qué debe ser ASTURIANOS, qué fin debiera tener. Creyemos, sinceramente, qu’esti movimientu debe centrase’n camudar la sociedá asturiana, dende abaxo y dende arriba, y empobinar a una nueva ética p’Asturies que defina nuna nueva moral la nuesa forma de ser y tar nel mundiu.
Cuálos deben ser los obxetivosd’ASTURIANOS.
- Camudar la sociedá.
El problema d’Asturies somos los asturianos. Necesitamos meyorar el capital social d’Asturies. El desconciertu de la clas media, la educación ayena a les necesidaes del país y cada vegada de peor calidá, l’escesu d’empléu públicu, una población vieya, l’altu porcentaxe de pensionistes y l’éxodo de la xuventú más preparada empobinó a una sociedá empantasmada, pocu dinámica y con una perbaxa tasa d’actividá, necesitada d’un propósito d’enmienda pa tomar soluciones rápides. Un nuevu contratu social en definitiva. Modernu, humanista, que tea lloñe de la distopía dixital que mos emboba; un enfotu común de futuru, una compaña onde’l trabayu, lo propio, la vanguardia y l’esfuerciu esporpollen y tean reconocíos.
- Garrapiellu d’opinión tresversal.
La sociedá asturiana tá somatizada. Hubiere, y hai, policía del pensamientu. La retórica política treslladó les sos miseries a los medios de comunicación entamando una imaxen de falsu enfrentamientu social; un teatro maniquéu. L’asturianismu caltria. Nélli caben toles ideoloxíes y tola sociedá. Nun debe ser un conxuntu de ‘agraviados del sistema’; la conciencia crítica, de la que tan faltos tamos, debiera ser el so norte.
- Empobinar dafechu una economía con perspeutiva de país.
Los asturianos debemos forxar con procuru una mentalidá competitiva y creadora. Nun podemos caer nel cobrar por nun facer un res, que paez l’oxetivu de munchos agora. Tou señala que’l Salariu Social convertiráse nuna esclerótica Sopa Boba. Tampoco’l Turismo (>12% del PIB astur; Euskadi 6,5%) o la terciarización, pueden ser la solución facilona. Debemos dexar atrás el vivir nel anacronismu y proyeutar un futuru de vanguardia. Esisten n’Asturies ya llugares d’ésitu, y en tolos sectores: enanchémoslos. Esi debiera ser l’oxetivu d’ASTURIANOS.
- Xusticia social comarcal y competitividá territorial. La mar como camín y recurso.
Anguañu’l país ye un territorio desparigüeláu. La dixebra ente l’aldea y la ciudá debe correxise ya pa facilitar la igualdad ’oportunidaes. Fracasos como’l Plan del Suroccidente y el bluf de l’área central destacaren la nuesa incompetencia urbanística.
La exa atlántica tien que ser ún de los nuesos espacios d’oportunidá y El Musel el so espaciu d’alcuentru, onde potenciar la lliga de ciudaes de l’Arcu Atlánticu. Tamos nel centro de la ciudá llineal que tá viñando ente Coruña y San Sebastián, enfilandrada na autovíal’l Cantábricu y qu’amesta los intereses del norte español.
- Introducir la ética’l trabayu na educación.
Fae casi 120 años que’l sociólogu Max Weber asoleyó el so ensayu La ética protestante y l’espíritu del capitalismu. El fracasu del catolicismu como productor d’una economía pionera ya yera entóncenes nidiu.
Nestes dómines onde delegamos tola educación de los nuesos fíos nos colexos, debemos meyorar la so calidá y conteníos. Tamos ¿formando? a les nueves xeneraciones inorantes de la realidá fonda de la comunidá onde viven y, peor entovía, ensin ambición. El demoledor hipismu educativu d’anguañu llastra ensin remediu’l nuesu futuru. El fomentu l’esfueciuy el trabayu nun tán nos curriculums educativos, onde l‘aprobáu xeneral avanza ensin duelu.
Xenerar, por exemplu, la mentalidá de que la Formación Profesional ye bona, y fundamental pa dar mano d’obra cualificada a les empreses punteres y crear emplegu y empreses de calidá. Nun fai falta estudiar abondo pa triunfar na vida. Ye más importante’l xeitu que la preparación. Asturies ye un exemplu palpable de tou ello: esportamos báramos de licenciaos, y nun tenemos obreros cualificaos. Tampocu l’empresariáu tá valoráu lo que merez.
- Entamar una estratexa, con oxetivos y plazos.
Agora nun hai un proyeutu de país a mediu y llargu plazu. Ningún partíu lu tien; tampoco l’asturianismu. Ensin rumbo nin timoneles vivimos na improvisación permanente. El que nun se planificare la transición d’un modelu industrial de ‘industria pesada’ cuando la so acabación taba vista fae más de trenta años quier dicir munches coses. El fiascu los fondos mineros fuere una muestra palpable de la inutilidá del réximen peronista que nos gobierna dende hai cuarenta años. La improvisada ‘descarbonización esprex’ impuesta a Asturies pa llavar la cara al gobiernu español frente a Europa fuere l’últimu casu de la nuesa descolocación.
Vivimos l’episodiu definitivu d’una nueva etnoxénesis emprencipiada na década los años cincuenta. La tercera, tres la romanización nos anicios d’Era y la xermanización nes dómines l’AsturorumRegnum. El nuesu grupu humanu tá mutando: ye’l momento d’un cambiu fondu.
Hai coses demasiado series pa dexales en manes de los políticos. Asturies tien que dexar de ser un activu ociosu. Pa ello tenemos que meyorar el nuesu capital humanu. Tener alministraciones públiques eficaces y atamañaes, instituciones afitaes, definir un modelu de país vanguardista y transmitilu a la sociedá. Esti oxetivu debe nacer dende la sociedá civil; los partíos nun fueron quien, nin sedrán, capaces de fixalu.
ASTURIANOS quier ser un ensame d’opinión y d’acción pa xenerar nuevos criterios: ser práuticos y operativos; tener idees clares. Camudar el nuestru capital humanu y crear ente toos (nun sobra naide), dende’l biotopo Asturies, una utopía pragmática.
