Venti idees pa un Estatutu asturianu del sieglu XXI

Incluir los derechos sociales, reformar la llei electoral y crear una axencia tributaria son dalgunes midíes que nos diben permitir avanzar como sociedá.

Recomendados

Francisco Javier Valledor
Francisco Javier Valledor
Profesor xubiláu. Ex conseyeru de Xusticia del Principáu d'Asturies por IX Verdes-Bloque por asturies.

Asturies precisa un nuevu Estatutu, una nueva redaición, una cadarma nueva y nueos conteníos. La reforma que se faga tien qu’algamar esti oxetivu: un Estatutu pal sieglu XXI.

Entamamos entós polo más nidio;  por da-y al Estatutu un preámbulu nel que se recueya la construición de la nuestra identidá hestórica, llingüística, cultural y al empar el nuestru enfotu políticu d’autogobernanos nel marcu del Estáu español y de la Xunión Europea embaxu los finxos reutores qu’afiten los muérganos internacionales na defensa de la paz, la democracia y los drechos humanos.

Hai un elementu fonderu que tien de recoyer tresversalmente, como ye un llinguaxe inclusivu, a onde la ciudadanía asturiana seya a reconocése.

¿Cuáles son dalgunos de los fitos fonderos?

El nome de la nuestra comunidá: Asturies.

El reconocimientu comu nacionalidá hestórica.

La oficialidá del asturianu y del gallegu-asturianu col sofitu mínimu irrisoriu que permita Foro (si nun hai otro…) con una disposición amestada na que se reconozan y perafiten los drechos de los falantes demientres nun esista la llei 3/5.

El reconocimientu del drechu consuetudinaríu asturiana sofitáu pola compilación fecha pola Xunta Xeneral.

La igualdá real ya efeutiva de les persones trans  y la garantía de los drechos LGTBI.

La igualdá de xéneru ya protección escontra la violencia machista.

Facer desplícitos los oxetivos y finxos reutores de les polítiques publiques.

Reconocimientu de los drechos sociales de la ciudadanía asturiana asina como de los sos deberes.

Agrandar y ameyorar les competencies.

Creación de la policía asturiana y la xestión del sistema penitenciariu.

Nel ámbitu institucional hai que finar coles llimitaciones d’anguañu p’algamar:

Posibilidá de dilir per anticipao la Xunta Xeneral ensin qu’haiga llugar una “llexisllatura curtía”.

Sistema ellectoral proporcional, paritariu de circunscripción única.

“Asturies precisa un nuevu Estatutu, una nueva redaición, una cadarma nueva y nueos conteníos”

Finar cola anomalía asturiana na elleición de Presidente/a pa que na primer vuelta seya escoyíu por mayoría absoluta y na segunda por mayoría simple.

Finar cola obligatoriedá de que’l/a Presidente/a seya diputado/a.

Acabu del aforamientu y midíes efectives escontra’l tresfuguismu.

Nueva estructura dafechu pal poder xudicial n’Asturies.

Creación d’una axencia tributaria p’Asturies.

Recoyer la figura del Procurador Xeneral.

Amestar la figura de la vicepresidencia del gobiernu.

Recoyer el modelu de relación col Estáu, les CCAA y les instituciones de la UE. Asinamesmu les relaciones esteriores d’Asturies en materies como Cultura, la emigración asturiana o la cooperación al desarrollu.

Incluyir la memoria democrática.

Introitar la posibilidá de que’l Gobiernu dicte decretos-lleis col valimientu posterior de la Xunta Xeneral.

Sustituyir les referencies al Rey pola Xefatura del Estáu.

Incluyir dafechu el Conseyu Audiovisual d’Asturies.

Regular y afayar les consultes populares nel ámbitu local y autonómicu.

Afitar dafechamente’l referéndum pa l’aprobación de futures consultes estatutaries.

Afitar beneficios fiscales y otres midíes pa refugar el vaciamientu de l’Asturies rural.

Crear un nuevu título sobre mediu ambiente y cambiu climáticu.

Too ello permitiría a la nuestra comunidá faer frente coles polítiques necesaries pa encariar ya iguar los nuestros problemes estructurales y avanzar na meyora de les condiciones de vida de la ciudadanía asturiana. Sirva esta reflexón comu aportación a un debate que la galvana del gobiernu Barbón p’abordalo pon en riesgu inclusu que puea abodáse nesta llexisllatura, yá que tres la so tramitación na Xunta Xeneral tien de facélo nes Cortes Xenerales enantes qu’estes se disuelvan nel 2023.

Actualidad

Dejar respuesta

Please enter your comment!
Please enter your name here