El viniente vienres 21 de xineru, a les 19h nel Llar La Llegra (C/ El Postigu Baxu, 40, Uviéu), va presentase l’ensayu de Pablo Batalla Cueto Los nuevos odres del nacionalismo español, que va abrir l’alderique sobre les fontes de les que bebe’l nuevu resurdir del nacionalismu español y la ultraderecha: faciendo un repasu sobre les nueves referencies que remanen les dereches na so batalla cultural a la d’esparder el nacionalismu, les polítiques económiques antisociales y, con ello, l’odiu a la diversidá social, cultural y a la tolerancia.
Nel ensayu, l’historiador Pablo Batalla Cueto presenta una radiografía percompleta de tola panoplia discursiva que tien el nacionalismu español. Nél analiza tanto’l discursu del revisionismu históricu como les implicaciones que tien el nacionalismu na estaya artística, onde afeuta, por casu, a la creación de videoxuegos.
Pablo Batalla Cueto ye historiador y ésti ye’l segundu ensayu qu’asoleya, depués de qu’en 2019 sacare La virtud en la montaña: vindicación de un alpinismo lento, ilustrado y anticapitalista.
