El presidente d’Iniciativa pol Asturianu, Iván Llera, y el vocal de rellaciones institucionales de la organización, Inaciu Galán, aconceyaron esti miércoles con representantes del grupu parllamentariu d’Izquierda Xunida. Dientro del alcuentru, los representantes de la organización de reivindicación llingüística treslladaron a la formación qu’han de ser conscientes de “la oportunidá hestórica pa la oficialidá que tenemos ente les manes”. “Alcontrámonos con una mayoría aritmética pa sacar alantre la reforma estatutaria cola oficialidá y nun podemos desaprovechala, porque nun sabemos si volverá a repitise” consideren na organización asturianista.
“Les condiciones de la negociación nun son les idónees, pues ta falándose de coses que queden fuera del marcu del Estatutu, pero esta ye la realidá cola que tenemos que trabayar. Ye’l momentu del alcuentru, el diálogu y el pactu, ya Izquierda Xunida nun pue quedar fuera d’él” señalan dende Iniciativa, que pide a Adrián Barbón “un mayor esfuerciu pa xenerar consensu y liderar la reforma estatutaria”
