La invesitgación del CISC algamó la creación d’una variedá de rosa única nel mundu, la Rosa Narcea, n’honor al llugar del que vien. Al rodiu d’ella creóse una empresa de base tecnolóxica (EBT) pa la producción y comercialización d’aceites, ente otros derivaos. Trátase d’una de les denomaes “roses antigües”, y tien aplicaciones pa la industria de l’alta perfumería y la cosmética, la medicina y, tamién, la gastronomía.
La Rosa Narcea carauterízase por tener una color y un arume especiales, y biltar namás nel mes de mayu. La recoyida d’estes roses ha de facese de mou manual y pela nueche pa que nun pierda’l golor. Esta variedá atopóse cuasi por casualidá nel xardín d’una casa familiar de la llocalidá de Carbachu. Los científicos del CSIC recuperáronla y analizáronla xenéticamente primero de crear la “EBT Aromas del Narcea”, que va sumar d’esti mou la Rosa Narcea a les poques variedaes antigües d’esta especie que se cultiven n’Europa, concretamente en Francia y en Bulgaria. Les eraes de cultivu atópense en Carbachu, Cibea y Xinestosu, a distintes altitúes pa comprobar les meyores condiciones de desendolcu de la planta, y los investigadores y promotres de la empresa innovadora enfótense en dir aumentando la producción d’exemplares hasta llegar a cultivar unes 50 hectárees.
