Mirái:

Asturies tien futuru, y son los sos pueblos y conceyos los qu'han d'axuntase pa nun afondar más nos erros del pasáu, nes lluches cainites y particulares.

Recomendados

Les brengues de güei

esnalen baxo.

Hai fiebres que nun se van y velenos que vendrán;

te mancarán, te salvarán,

t’amagostarán…

 pero vamos, too ta claro,

ta too claro yá:

Recuperar aliendu pesie a resultar estraño

nun ye daqué raro, nun ye daqué malo.

Pero si nun poemos iguar, camudar,

reformular el nuesu espaciu:

¿Cómo tresformar la sociedá?

Facer comunidá, ye facelo a diario.

Naturalizando, espeyando, otra realidá

no cotidiano,

 ente collacies y collacios,

pa reconfigurar, dir a lo sano, al curiar.

Reconocencia l’otru como paradigma revolucionariu

y llevantar, y llevantanos yá.

¿A qué esperamos? ¿A qué esperamos?

¿A qué esperamos? ¡Va!

¿A qué esperamos? ¿A qué esperar?

(Lletra del primer cantar del discu ‘Fesoria y Garabatu’ de Bimenes UnderPrau, 2022)

                                                                                                         

Asina entama’l nuevu discu de Bimenes UnderPrau: Fesoria y Garabatu. Y quinxere que lo qu’intenta tresmitir mos sirva de guiya pa poer abordar una riestra costiones que m’abulten necesaries si falamos de tresformar la realidá.

Sicasí, entamaré pelo, quiciabes, más banal:

Nun llevo bien la hipocresía. La deshonestidá. La verborrea… Y ye que nestos tiempos paez tar mui de moda. Anque nel PSOE y la FSA ye daqué que paez eterno.

Va tiempu nomé Mr. BlaBlaBla al Presidente d’Asturies, un poco a mou de chancia y en comparanza con Javier Fernández.

Yo sé que quinxere ser más que’l personaxe qu’arrepresenta, y que tien un matu internu; como matu internu tien Adrián Pumares nel so propiu partíu. Pero ye que nun soporto la hipocresía. La deshonestidá. La verborrea.

¡Claro! Tu sientes falar de xemes en cuando a Adrián Barbón y dices: “Contra! Llueu de tener a un Mudu de Presidente del Gobiernu d’Asturies, qué bueno ye sentir, a vegaes, coses con xeitu”.

Pero lo de que les pallabres les lleva’l vientu nun ye una fras fecha ensin más, ye un puntu claru.

Javier Fernández na sesión de investidura de Barbón. Semeya: Iván G. Fernández

L’otru día, precisamente, lleí un tuit d’estos que gusten al nuesu Presi: Que si más del 60% de los votantes de Mélenchon nun pensaben votar a Macron. Adrián Barbón taba intranquilu, con razón, pues ello supondría una victoria de Le Pen. Más agora que ta garrando fuerte’l palu fesoria del antifacismu.

Pero claro, esi tuit con muncho sentíu, como sentíu tien el cordón sanitariu a VOX, queda en na y  en demagoxa barata: Si nel casu’l famosu cordón esta proclama vien llueu de regar de perres y minutos al partíu españolista; la francesa provién de nun facer un tuit o unes declaraciones endurante la campaña elleutoral emburriando por que’l partíu socialdemócrata francés, o los verdes, o los comunistes de llibru, pidieren el votu pa Mélenchon.

Si Barbón fixere’l cordón sanitariu dende l’entamu, VOX nun tendría perres nin altavoz pa la campaña-fedor que fexo escontra la Oficialidá del Asturianu o la Reforma del Estatutu. Quiciabes nin tan siquier veríemos campañes publicitaries cola so cara o cola de Pumares.

Si la izquierda supuesta que nun tenía opción denguna d’entrar na segunda vuelta francesa quinxere realmente que nun entrare Le Pen, votaría a Mélenchon. Y la disputa taría ente Francia Insumisa y el partíu de Macron.

Poro, ye importante tener clares les coses y nun dicir namás, sinón facer. La combinación de la Pallabra y l’Actu ye perimportante, porque sinón abulta que lo que nun se tien ye proyeutu políticu de denguna clas y va virándose en según sopla’l vientu. Total ¿Nun ye esti, quien lleva finalmente les pallabres que nun pretenden ser aiciones?

D’otra banda, resulta cuanto menos indignante que tanto’l PSOE como la FSA tean tol día col discursu’l mieu, con que vien el llobu voxeneta, o la corrupción del PP. Porque si la to aición de gobiernu, socioeconómica o sociocultural, ye igual que la de la drecha, lo más probable ye que pa la xente, pa les clases populares, resulte inclusive pior que si les fixere la drechina o la drechona.

Igualmente que me paez estupendo que Barbón y la FSA abracen la Oficialidá o l’asturianismu. Pero nun paez honesto cuando los esfuercios pa la Reforma del Estatutu foron 0.

Como supón una tomadura de pelo tener un “Plan” pal retu demográficu pa llueu esbabayar cuando se plantega la tresferencia del ferrocarril

Manifestación pola oficialidá. Semeya: Iván G. Fernández

Si fais continuamente polítiques neolliberales lo más probable ye que la xente vote a la drecha, cuando non a la drechona, o s’abstenga creyando un espeyu de realidá realmente falsu.

“La oportunidá del remocique estatutariu, güei aparáu dafechu, foi una perda tiempu, d’enerxía y esfuerciu”

En tou casu, ye pernecesario abrir camín y saltar sebes. Ente l’andanciu y agora la situación n’Europa, Asturies nun pue siguir na sienda la pasividá: Nin el Gobiernu, nin el Pueblu Asturianu. La oportunidá del remocique estatutariu, güei aparáu dafechu, foi una perda tiempu, d’enerxía y esfuerciu. Una pena d’intre importante, que mos fae agora tener ciertes deficiencies operatives énte tiempos cambiantes. Ente otres coses porque nun había per parte de trés de los partíos necesarios pa ello, un compromisu real. Pero tampoco hebo intelixencia política del cuartu nos últimos compases -cosa que teo escrito equí-. Un xuegu trileros ente aquellos que se pudieron convertir na alternativa de dreches (democrática), y aquellos que falar falen muncho pero facer cuésta-yos más que dir a la yerba a un vagu.

Pamidea’l Gobiernu Asturianu tira muncho rentes, estira’l tiempu ensin saber qu’esti nun ye infinitamente elástico. Xuega continuamente coles pallabres, pero sigue amosando nun tener un proyeutu país, y tampoco un proyeutu “a secas” de futuru. Paez más el continuo esfuerciu por caltenese que l’esfuerciu por realmente construyir una Asturies con mañana y con esperanza; que nun quede desaniciada ensin más pol pasu los años.

Énte esti panorama ye necesario construyir alternatives constituyentes que-y dean vuelta al calcetu. Sabiendo qué ye lo que queremos, aldericando sobre los elementos comunes y puliendo aquellos que pudieren xenerar dalgún tipu fricción.

Pasar olímpicamente de cadarmes que tienen lóxiques tacticistes non pa cola tresformación, sinón pa col caltenimientu d’eses mesmes cadarmes. Construyir dende los conceyos una alternativa realista y poderosa pa toa Asturies. Dende Taramundi a Ribadeva. Dende Somiedu a Carreño. Dende les Cuenques a los montes d’Amieva. Dende les ciudaes y villes hasta l’últimu pueblu de Yernes y Tameza.

Y de la mesma manera que se plantega’l qué, igualmente ye necesario falar y constituyir los cómos. Les formes. Nuna posición de tresformación albídrase necesariamente una sociedá futura que se supón sedrá llibre, sedrá equitativa, primará la xusticia social, la tranquilidá frente a la incertidumbre, y nun habrá espaciu pa los maltratos a los que mos tien sometíes l’orde-de-coses-imperante. Pa ello, ye interesante concluyir qu’eses formes esperaes han d’establecese nos nuesos espacios tresformadores. Si un espaciu tresformador -seya un partíu o un coleutivu cualesquier- nun reproduz les formes esperaes d’esos mundios fantásticos y emancipadores por venir, y por contra caltién la competitividá, los egos, les rivalidaes estériles, el revanchismu, etc., nun se podrá apresentar énte la sociedá como un interlocutor válidu pa la execución d’esa tresformación profesada. Tampoco como garantía d’una articulación afayadiza pa esa mesma tresformación cacarexada al altu la lleva, pero ensin concreción denguna.

Llangréu. Semeya: David Aguilar Sánchez.

Pa esto’l feminismu -realmente exercíu- ye fabulosu. Pues ye’l que pon de relieve la política de curiaos. Ye’l que mos deprende fórmules y formes realmente tresformadores: De la reconocencia l’otru como paradigma revolucionariu. De l’aida mutuo. De la solidariedá. Del sofitu compartíu. De la empatía como ferramienta revolucionaria frente a mundios y sociedaes construyíes na desconfianza, l’individualismu, l’atomismu social y la competición naturalizada.

D’esta manera, ye interesante plantegar los mundios por venir constituyéndolos dafechu na nuesa cotidianeidá y nes formes que caltenemos colos y les demás; compañeros y compañeres de camín; vecinos y vecines d’Asturies, día a día. 

Asturies tien futuru, y son los sos pueblos y conceyos los qu’han d’axuntase pa nun afondar más nos erros del pasáu, nes lluches cainites y particulares. Pa nun afondar más nos chantaxes de patronales y contubernios. Pa nun cayer nes mesmes dinámiques de siempres que mos llevaron hasta equí: Una Asturies desmantelada, avieyada, qu’espulsa, poles poques oportunidaes que plantega, a la so mocedá; una Asturies a la que maten culturalmente día sí y día tamién. Onde esiste non l’autodiu, sinón la vergoña-de-ser.

Nun permitamos que lo qu’enxamás asocedió asoceda güei. Tresformemos el nuesu país pa dar esperanza al mundiu. Nun hai más graciosa idea que xuncir a los clanes, y da-y un emburrión a la vida pa ser vivida qu’alloñe’l nuesu constante y persistente derrotismu.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí