Asturies reclama los sos drechos llingüísticos delantre del odiu de la estrema derecha

La capital uvieína acoyó, una vegada más, la manifestación pola oficialidá nel marcu de la 43 Selmana de les Lletres Asturianes

Recomendados

Elena Plaza
Elena Plaza
Es periodista, formadora en cuestiones de género, contadora de historias y enredada entre ruralidades.

Ente 8.000 y 10.000 persones, según cuentes de la organización, axuntáronse esta mañana na manifestación pola oficialidá alrodiu de les celebraciones de la Selmana de les Lletres Asturianes. Entamó a les doce del mediodía na estación del Norte d’Uviéu pa zarrar l’actu na plaza La Escandalera cola llectura d’un manifiestu y el conciertu d’Algaire.

El cantar de les pandereteres abría una manifestación que convocó la Xunta pola Defensa de la Llingua Asturiana y que sofitaron cola so presencia la Reciella pola Oficialidá, Suatea, CC.OO., CSI, Podemos Asturies, Mocedá Comunista y Andecha Astur, ente otros colectivos. Tamién taben los Mazcaritos d’Uviéu, representantes de l’Academia de la Llingua y militantes perconocíos como Rodrigo Cuevas, Pablo Texón, Consuelo Ríu, Pepín de Muñalén o Dani Ripa, ente otros.

Semeya: Iván G. Fernández.

Esti movimientu reivindicativu nacíu va 40 años “sigue vivu y caltiénse xoven cola mocedá que sofita añu tres añu la oficialidá del asturianu y del gallego-asturiano. Siguen siendo puxu cuando les coses vénse bien o dacuando menos bien”, afirmó Carlos Pulgar, portavoz de la Xunta. “Esti puxu ye siguir reivindicando y representando lo que ye la sociedá asturiana, un movimientu per parecíu a lo que pasa n’otros, como’l feminista o’l llaboral”.

Semeya: Iván G. Fernández.

Xaime Martínez, Miguel Sánchez Cadella, Alicia Villanueva y María Fernández Abril foron les persones encargaes de lleer un testu que remarcaba que’l vasu ta “abondo más qu’amediáu”, a pesar de que si nun hai oficialidá “nun foi por falta de puxu de los que tais equí”, y refiriénrose a les negociaciones en falsu p’algamar un alcuerdu coles distintes fuercies polítiques con representación na Xunta Xeneral del Principáu: “Señalar a los que refugaron sentase a falar, los del discursu del odiu, los que dicen que ye una llingua inventada, que necesiten de traductores porque nun la entienden”.

Carlos Pulgar, de la Xunta pola Defensa de la Llingua Asturiana. Semeya: Iván G. Fernández.

“Que los drechos llingüísticos de les asturianes y los asturianos nun pueden quedar pa lo último, que nun pue espardise un discursu del odiu”, y entrugaron si esti alcuerdu nun s’alcanzó por “falta de cintura o por incapacidá negociadora”. Dende la Xunta señalóse que’l verdaderu alderique nun llegó ónde debiera, “el Plenu de la Xunta Xeneral, y equí la respuesta teníala la FSA, que tien la capacidá d’abrir la reforma del Estatutu”.

Semeya: Iván G. Fernández.

Na declaración tamién plantegaron la reflexón sobre qué hubiere pasao “si’l PSOE cumpliere’l programa de 2019, la so propuesta 186, ¿qué diba salir d’esi alderique?”, y denunciaron “l’apueste pol esterminiu de les llingües d’Asturies. Esta política de xestos diba convertise nuna política de mueques con tantu xestu mentantu posterguen la respuesta”.

Semeya: Iván G. Fernández.

Esta situación supón-y “graves pasos atrás pa la oficialidá de la llingua” y punxeron como exemplu la refuga de la Universidad d’Uviéu a utilizar l’asturianu, “contraviniendo los sos propios estatutos cola complicidá del Gobiernu”. Inda hebo un recuerdu pal profesoráu d’asturianu y de gallego-asturiano, ensin reconocencia, “dalgo qu’hasta Barbón reconoz que ye pola falta de oficialidá”, y señalaron la perda de drechos culturales y sociales, de representación nos medios de comunicación como la RTPA o les plataformes audiovisuales.

L’enfotu de la derecha estrema y la estrema derecha “n’esparder el so odiu ente la opinión pública” tamién foi denunciáu. “Dicen que ye una llingua que nun fala naide. ¿Somos nadie tola xente que tamos equí glayando dende va años? Hai que protexer el nuesu patrimonio llingüísticu”, reinvidicaron enantes de dar pasu al nuevu folk fusión astur de la mano d’Algaire, qu’animó a les persones presentes a bailar baxo’l sol d’esta primavera.

Algaire. Semeya: Iván G. Fernández.
Semeya: Iván G. Fernández.
Semeya: Iván G. Fernández.
Semeya: Iván G. Fernández.
Semeya: Iván G. Fernández.
Semeya: Iván G. Fernández.
Semeya: Iván G. Fernández.
Semeya: Iván G. Fernández.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí