El valor del asturianismu

Mentanto'l movimientu cultural asturianista va algamando mayor preponderancia, la so faceta política nun sal del derrotismu y la desgana.

Recomendados

Xune Elipe
Xune Elipe
Músicu, cantante del grupu de rock "Dixebra" y activista en defensa de la llingua asturiana

Escomienza un ciclu políticu nuevu que va ser perimportante pal devenir futuru d’Asturies, ésti va tar marcáu fondamente poles elecciones autonómiques del próximu mes de mayu y pol resultáu que salga d’elles. A nun tardar les organizaciones polítiques van ponese en mou electoral dafechu, engrasando les sos maquinaries y pisando l’acelerador. Mentanto, los que nos autorreconocemos nesi movimientu que dio en llamase asturianismu siguimos güerfanos de pá y ma, viendo too ello dende afuera, dende una distancia autoimpuesta o obligatoria.

L’asturianismu contemporáneu, surdíu a mediaos de los años 70 del pasáu sieglu, algamó incidencia social y punxo les bases que permitieron la so permanencia tou esti tiempu hasta l’actualidá. Sicasí, l’éxitu nel campu cultural nun se correspondió nel terrén políticu, onde les distintes y múltiples organizaciones que quixeron convertir en votos esi asturianismu social nun fueron a ello. Por cuenta d’esto foi creándose y instaurándose una especie de señardá, caracterizada por una sensación de derrota y frustración, que nos convierte en pesimistes innatos a los y les que procedemos d’esa cultura política.

“L’asturianismu contemporáneu, surdíu a mediaos de los años 70 del pasáu sieglu, algamó incidencia social y punxo les bases que permitieron la so permanencia tou esti tiempu”

Por embargu, si analizamos la historia fríamente, vemos cómo al marxe de la cuestión electoral pura y dura, l’asturianismu -dende’l so surdimientu- foi quien a incidir y condicionar la vida social, cultural y política d’Asturies. Bien ye verdá que non tolo que quixéremos o nel sentíu que nos gustaría; los que yá llevamos nesto unes cuantes décades alcordámonos de cuando, nel empiezu del llamáu ‘Estáu de les Autonomíes’, los representantes políticos asturianos valoraben entamar una comunidá conxunta con Lleón o la futura Cantabria. Nun hai que ser «grandón» pa rescamplar que l’asturianismu tuvo muncho que ver na decisión final d’acceder a esi estatus nuevu de manera específica y solitaria. Cuestión aparte ye la modalidá pola qu’accedimos a él, al traviés de la llamada «vía lenta» que representaba l’Artículu 143 (frente al 151 de comunidaes como Euskadi, Cataluña, Galicia y Andalucía) de la Constitución, con menos competencies y poder de decisión. Tamién nel testu del Estatutu d’Autonomía se notó la influyencia del asturianismu al llograr introducir nél una referencia a la llingua asturiana nel so Artículu 4, anque nun estableciera la consideración d’oficialidá de la mesma y la redacción final fuera tarazada nel Congresu de los Diputaos en Madrid amputándo-y la frase «como lengua específica de Asturias». Na recuperación del órganu históricu d’autogobiernu del nuestru país, la Xunta Xeneral, tamién intervino l’asturianismu siendo los primeros en reclamar la so restitución, anque finalmente les competencies asignaes a esta institución fueren curties (hasta’l puntu de nun poder autodisolvese anticipadamente y convocar elecciones). Nun podemos escaecer tampoco’l papel xugáu na implantación y popularización de los nuestros simbolos colectivos, especialmente la bandera, anguaño aceptada y reconocida  socialmente de manera natural (nel so momentu llegara hasta plantegase facer un concursu pa dotanos d’una enseña propia). Y qué dicir de la cuestión llingüística, que nun s’entiende ensin l’aportación crucial y central del asturianismu, con llogros como la creación de l’Academia de la Llingua Asturiana o’l caltenimientu de la reivindicación social de les últimes cuatro décades.

Ilustración de Mybro a partir de una semeya de Conceyu Bable.

Nel nuestru haber ta’l que, con un establishment a la contra, fuimos quien a articular un movimientu de referencia na Asturies contemporánea que, mesmamente, en delles ocasiones pasó a la ofensiva anque fallare la pata política. Pero dende hai yá unos cuantos años, mentanto’l movimientu cultural asturianista (lliterariu, musical y artísticu en xeneral) va algamando mayor preponderancia y consideración, la so faceta política nun sal del derrotismu y la desgana. Atomizáu, faltu d’una estratexa clara, enrocáu en posiciones obsoletes, ensin un referente unitariu tresversal y plural, desapaecíu del debate, reducíu a ser inluencer de chigre/facebook/twitter o guardián de les esencies en pequeños grupúsculos. Magar too ello, nun quiero cayer nesa debacle depresiva, salgamos d’esi bucle, miremos les nuestres aportaciones a l’Asturies moderna con arguyu, reivindiquémonos, reinventémonos y sigamos na llucha. Nun tresmitamos a les xeneraciones nueves que s’incorporen o s’interesen pol nuestru movimientu les zunes y errores que cometimos anteriormente, nun-yos trespasemos esa sensación de derrota que nun se correspuende cola realidá. A fin de cuentes, dalgo fadríemos bien cuando nos ambientes políticos actuales «ta de moda» autocalificase como ‘asturianista’, la palabra máxica que te convierte n’otra cosa distinta a los demás, seya p’amatagar les acusaciones d’inxerencia esterna (Podemos Asturies) o pa tapecer el pasáu sucursalista (FSA). L’asturianismu más nuevu tien el llabor d’autoorganizase, d’anovar el discursu, de torgar ambientes escluyentes, de clarificar estratexes y de crear el texíu que permita tener protagonismu y capacidá d’influyencia na vida política del país nun futuru cercanu.

Artículo anterior
Artículo siguiente

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí