Carta abierta a los pacones de tola vida y al neocasposismu tanganeru (y a quienes tienen de tratar con ellos)

Asina que queríos Pacones: Básicamente odiais al PSOE porque odiais realmente les midíes de dereches

Recomendados

Queríos pacones del mundiu mundial,

He equí una reflexón que me prestaba compartir con vós. Resulta que llevo tiempu pensando nes vueses frustraciones. Porque aparentemente aquel 15 de mayu de 2011, práuticamente tol mundiu s’alineaba con esi irrumpir de tiendes de campaña y asamblearismu que diba espoxigando per munches places españoles. Sacantes aquellos que paecíen encloyar el discursu de los media, con que si yera aquel espaciu un ñeru de gochos, porreros y rojos con rau. Lo cierto ye que la simpatía y la capacidá de movilización del 15M foi espectacular, gobernando, amás, el PSOE.

Lo cierto, amigos y amigues Pacones, y equí adelanto una sentencia que vos quería treslladar; tolo que vos paez fatal de la izquierda correspuende cola aplicación de polítiques neolliberales y capitalistes fundamentalmente del PSOE. Ye cierto que lo considerais como’l xigante de la izquierda española, pero dexó de ser d’izquierdes cuantayá.

Caltién, porque nun pue ser d’otra manera, ciertos xestos que-y permiten garantizar un mínimu de simbolismu social. Por exemplu cuando falen del matrimoniu ente persones del mesmu sexu, o’l “cheque-bebé”.

De fechu, güei, el propiu Presidente del Gobiernu, Pedro Sánchez, pa presentar les bondaes del actual Gobiernu d’España, necesita asoleyar les midíes curiosamente feches pol partíu col que gobierna, Unidas Podemos; o midíes presentaes pol bloque d’investidura. Ente otres coses porque poco aportaron los ministerios que’l PSOE dirixe.

Movimiento 15 M. Foto: Iván G. Fernández

Y ca midida, de la cual agora fai gala, tuvo de ser peleada hasta’l desgaste. Poco entusiasmu en definitiva pa cumplir col Alcuerdu de Coalición. Manca, especialmente, l’incumplimientu d’aquellos elementos fáciles d’aprobar, ya hipercomprometíos pol “Sanchismu Revolucionariu”, qu’una vuelta pasada la investidura… “Pues si te he visto, no me acuerdo”.

Temes como la Reforma Llaboral (Reformada, pero non sustituyida por otra llexislación realmente eficaz, garantista y marcadamente social); o la derogación de la Llei Mordaza, son aspeutos cuirosamente abandonaos pol Sanchismu.

El PSOE ye esi aparatu en forma de pegollu’l Réxime del 78, que combina a la perfeición una hestoria colos claroscuros de cualesquier organización centenaria; un sofitu nostálxicu y familiar importante asitiáu nos territorios; y un compromisu eternu col sistema monárquicu postfranquista -non necesariamente col Rei de turnu-.

D’esa manera opúsose a la investigación de la Casa Real, o a que se dieren desplicaciones nel Congresu.

D’esa manera se pue entender que sovencione la enerxía pero nun la intervenga nun momentu nel cual la situación ye, por tibia que seya pal nuesu Estáu, dramática.

Nun hebo problema dengún en viender el nuesu sistema públicu d’enerxía a peseta -entamada por Felipe González en 1988-. Agora recuperalu, o encadarmar ún nuevu, paez una quimera.

Sovenciónase la enerxía o l’alimentación cola famosa bolsa de la compra, pero nun s’intervién nel mercáu que permite esos desaxustes. Ye dicir, facemos el copagu o inclusive perdemos ingresos como nel casu de les baxaes d’impuestos ensin camudar lo que verdaderamente ta podre. Permitimos que les grandes empreses faigan lo que quieran y pa enriba de too, per aciu los nuesos impuestos, repagamos too aumentando, curiosamente, el porgüeyu de la multinacional de turnu: Un despropósitu.

Y amigu Paco, esto nun ye d’izquierdes.

En tou casu, y a lo que diba primeramente… socioeconómicamente lo que vos enrita de la izquierda ye que faigan polítiques de dereches -esto yo creo que cafia a too Dios-. Cierto ye que la trampa ye una llambionada pal neolliberalismu, pues lo que-y tendría de facer frente, reproduz de manera tibia, a vegaes, los sos postulaos dende formaciones que se dicen d’izquierdes.

Asina que cuando’l PSOE nauguró n’España les ETTs, igual daquién pensaba que la temporalidá llaboral yera d’izquierdes…pero non.

O cuando fexo la 13/14 cola OTAN, que d’entrada non, pero yá si eso sí…

O cuando vimos a Aznar o Rajoy tentar llendar de dalguna manera al Rei -¡Ojo!-; paecer paeciere que’l republicanismu fantasmagóricu’l PSOE esllíase d’una forma que mete mieu al pánicu.

O cuando vimos los tejemanejes del Sr. X y el PSOE colos casos de corrupción o los contautos con grandes empreses venceyaes al narcotráficu colombianu -Sarasola mediante-; igual ye que la xente pensaba qu’eso yera d’izquierdes… pero non.

Investidura de Felipe González, en el Congreso de los Diputados. Foto: Twitter

Quienes conocieron y denunciaron el casu Flick, sabíen qu’eso nun yera d’izquierdes. ¿Cómo sedría d’izquierdes cobrar un millón de marcos alemanes d’una empresa nazi? Lo cierto ye que’l casu Flick quedó en na, soterráu, sacantes una denuncia un tanto probe del entós dirixente del PCE Santiago Carrillo. El PSOE de Felipe González salvóse por una votación mayoritaria nel Congresu que por dicilo de dalguna manera lu absolvió. Anque ciertamente habría de dicir que foi la propia llexislación. Pues aquella trama nun yera imputable xustamente cuando se produxo. Sedría poco tiempu dempués de la realización del pagu que se prohibiría nel Estáu Español les donaciones veníes del estranxeru. Y dirán vustedes: “Vaya parágrafu llargu a cuenta d’esta costión”. Pero claro, ye que falamos del entamu del Réxime del 78, nun orde nel cual la Monarquía foi metida con calzador (Suárez dixit), pa evitar la República. Y Flick (La Fundación Friederich Ebert), financiaba per toa Europa partíos que sirvieren pa frenar “el comunismu”. Ye dicir, lo qu’efectivamente podíemos entender daquella como “izquierda”. Falamos de fines de los setenta entamos de los 80. Y ensegún la propia Fundación, aquel millón de marcos foi a parar al PSOE porque lu entendíen como’l meyor posicionáu pa frenar al comunismu nel Estáu Español. Too ello evidencia y sorraya qu’esto nun ye d’izquierdes. De toles maneres, na nuevo cara al sol, pues nesos mesmos años 70 -yá desclasificaos tán esos documentos-, la CIA tomó a munchos dirixentes españoles como “assets”, precisamente cola mesma intención que Flick.

Pero, más alló de fantástiques películes onde la realidá supera la ficción, tamién cuando introduxeron n’España l’Informe Abril que daba’l pistoletazu de salida pa la privatización del sistema sanitariu. Igual ehí la xente pensaba qu’eso yera d’izquierdes… pero non.

O reformar la Constitución pa condicionar el gastu (Reforma Express del Art. 135 de la Constitución). Reformala nuna nueche d’agostu col PP… bono, pues igual ye qu’eso se piensa d’izquierdes… pero non.

Asina que queríos Pacones: Básicamente odiais al PSOE porque odiais realmente les midíes de dereches.

En cuantes a los mantras de los últimos años rellacionaos con costiones polítiques y sociales: Feminismu y Plurinacionalidá fundamentalmente, vaigamos per partes:

Pueo atalantar qu’haiga coses que resulten un tanto “precipitaes”, pues se tiende, a vegaes, a cuerrer más que la sociedá. Pero entendéi delles costiones:

  • El llinguax inclusivu, el qu’usa plural femenín, por casu, o’l qu’usa la forma conxunta masc-fem., ye igual d’artificial que dicir “Crush”, o dicir “Brunch”, o dicir “Crossfit” o dicir “esternocleidomastoideo”. Dependiendo de cómo s’encadarma una llingua podemos albidrar cómo s’encadarma una sociedá. Pues les llingües manifiesten y espeyen los esquemes, axiomes, y categoríes de pensamientu qu’una sociedá incorpora y desenrolla. La masculinidá nes llingües romances ye clara. Hai elementos qu’una llingua, por exemplu, xermánica; o una tan prósima como l’euskera, nun tien d’abordar, pues la so forma d’encadarmar la llingua nun presenta estos problemes de representatividá na fala -igual apresenta otros-. Podríemos entrugar que cuál ye’l problema de que les muyeres se sientan incorporaes a un neutro-falsu en “-os”; pero de la mesma manera podría entrugase, qué problema habría en qu’un home se sintiere incorporáu nel neutru femenín “-es”. ¿Nun somos toes persones? Pues nun entiendo’l drama. En cualesquier casu, nun implica esto la obligatoriedá del usu d’una o d’otra forma, y sí una deferencia o empatía -dame igual dende ónde se faiga- haza una parte de la sociedá -la metá-, que foi tapecida sistemáticamente en práuticamente la totalidá de les estayes de la vida -esto nun ye discutible-.
  • El llinguax inclusivu “-ei”, en castellán “-es”: Hai a quien-y pue paecer una pih.ada, pero hai munches persones que nun quieren respuender a una categoría de xéneru específica y resuelven nun neutru propuestu col que se sienten más a gusto. Nun implica que quien nun se sienta identificáu con ello lo axencie pa sí, pero tampoco entiendo’l disgustu, como si se toviere cometiendo una felonía espectacular. Ta a les clares que Paco quier sentir qué pasa colos carburantes, y mientres d’esto-y tán cuntando que van facer una Llei Trans, y nun lo pescancia del too. ¡Pero cagonmimantu Paco! que ye que tas criticando a quien propón esa Llei Trans, qu’al tiempu propón una banca y una empresa d’enerxía públiques, asina como una política internacional diferente, que fadría que’l preciu d’esi carburante o d’esa lletricidá amenorgare. ¡Claro! Lo grave ye que pienses que namái que falen de la Llei Trans y de que faen los plurales “raros” (media dixit).
  • Feminismu con toles lletres: El feminismu, Paco, nun ye un sistema de pensamientu que pretenda sumir al home no que l’home sumió a la muyer. Nun esmolezas. La to integridá física ta asegurada. El feminismu pue ser definío de manera simplista, básicamente, como la busca d’igualdá -podríemos actualizar n’equidá- ente l’home y la muyer. Cualesquier home habría tar feliz por esto, ente otres coses, porque tou home tien a lo menos una madre y dos güeles. Podría amás tener hermanes. Quiciabes moces o muyeres coles que case. Inclusive fíes. ¿Por qué resulta llamadero que’l padre, como padre, apruza como sobreprotector de la so fía en cuantes que crez un poco, y entama salir perende? ¿Por qué fai, seique, comentarios so la so forma de vistir? ¿Por qué s’amuesa siempres distante énte los sos mozos? ¿Nun sedrá, que’l padre, siendo padre, sabe perfechamente cómo suelen actuar “los tíos”? ¿O ye que considerais como homes, a les vueses madres, poco menos que como coses que tán ehí pa lo que tán? Nesti sentíu, siempres me llamó l’atención la esmolición por exemplu por ETA (lóxica, per otra parte, eh), que mató en tola so actividá armada a 669 persones (183 civiles y 486 miembros de los Cuerpos de Seguranza del Estáu. 1975 a 2010 [35 años d’actividá]), y dexó otru tanto de feríos, mutilaos, etc.; mientres que por violencia -estrictamente de xéneru, nun voi cuntar les doméstiques-, namái nel añu 2021 hebo 30.141 víctimes (datos del INE), morriendo 43 muyeres. Dende xunetu de 2003 a xunetu de 2022 morrieron 691 muyeres [19 años]. Ñegar la esistencia d’estos datos ye una barbaridá. Maxino, Paco, que tarás conmigo en qu’esto ye una burrada. Que nun te prestaría que-y asocediere nin a to madre, nin a la to hermana, nin muncho menos a les tos fíes. Dende llueu, digo yo, que nun lo fadrás cola to muyer o pareya. Asina que pa ello ye l’educar a los homes en nun ser unos gañanes; y a les muyeres a nun se dexar “gañanear” por intarders ya incels.
  • Territorialidá: Ta a les clares que los procesos dixebriegos son tirantes nel Estáu Español -ente otres coses porque hebo un conflictu armáu nún d’esos procesos-, anque la única territorialidá que vivió una independencia declarada podríemos dicir que foi Asturies -1808, 1934, 1937- (y Lleón), y Fucking Cartagena (1873). Bono, seyamos xustos, en dengún d’esos cuatro acontecimientos se taba independizando’l territoriu por cuenta d’un movimientu nacionaliegu o dixebriegu (sí, con un calter claramente soberanista); sinón por reaición sociopolítica y socioeconómica. En 1808 énte l’invasor francés. En 1873 pola busca d’una República Federal dende abaxo. En 1934 nuna revolución obrera y campesina que dura un mes. En 1937 pol aisllamientu’l bandu antifacista. Lo cierto ye qu’a Paco-y ofiende sobremanera lo fragmentao que resulta l’Estáu: Que si hestories identitaries. Que si llingües per tolos llaos. Que si instituciones y competencies propies… Paco, por embargu, que nun vive con prestor esa realidá diversa, atiende, eso sí, a una hestoria identitaria específica -dende l’españolismu-. Con una llingua específica -el castellán-. Y una institución fundamental -la Monarquía-, con unes competencies básiques -si eso- pa les autonomíes, o un centralismu debastador. Paco nun comprende cómo ye posible que dientro d’una nación puea haber otres naciones. Eso dicía Gustavo Bueno… que llueu’l probe s’autocorrexía en metá del so propiu discursu porque nun se sostenía nin anque quinxere.

La costión ye que l’Estáu Español entendío como la realidá política de la Península Ibérica (voi ser equí más “majo” con Paco que nunca), siempres foi fragmentaria, siempres caltuvo la so idiosincrasia, y siempres tuvo en conflictu con cualesquier poder que pretendiere ser centralista. Poro, los Borbones se cargaron tolo que quedaba d’Imperiu y cuasi fai implosionar la propia realidá constitutiva del Estáu. A min siempres me presta falar d’esta tema dende l’escudu del Reinu d’España. Porque ye llamadero que l’escudu contenga en sí lo qu’a Paco nun-y presta na.

L’escudu del Reinu d’España, Paco, a min préstame -anque seya irónicamente-. Lo que nun me presta ye la Corona que descansa sobro él. Y ye perilustrativu. Resulta que nél aprucen les Soberaníes que constitúin l’Estáu: La Corona de Lleón (Asturies, Lleón y Galicia); el Reinu de Castiella; La Corona d’Aragón (Aragón, Catalunya, Valencia y Mallorca); El          Reinu de Navarra (País Vascu y Navarra); Reinu de Granada (qu’arrepresenta tol dominiu musulmán ss. VIII-XV); el Plus Ultra (territorios d’ultra mar, como pue ser la propia         Canaries); y les flores de lis borbóniques qu’arrepresenten la Dinastía que lleva la Corona d’enriba’l tou, y perenne s’apresenta como Xefatura del Estáu.

Queríu Paco, he equí l’amuesa de la diversidá constitutiva del Reinu d’España. Y por cierto, ye la so grandeza. Pero ye que nun hai momentu na hestoria onde esto nun s’intentare frayar de cara a dotar de mayor predominancia a una de les unidaes polítiques (Castiella, llueu estrictamente Madrid), usurpando, por cierto, a la propia Castiella la so cultura y llingua. Lo mesmo asocede cola cultura andaluza, ridiculizada a más nun poder, y usada como ariete cultural pa contra les demás; frivolizándola sinón apropiándose d’ella direutamente. Tal y como asocede cola cultura xitana (por poner casu: El Flamencu).

Manifestación pola oficialidá. Foto: Iván G. Fernández

Paco, resulta que vives nun Estáu que tien distintes llingües: Galicia (Gallegu); Asturies (Asturllionés y Gallegu del Eonavia), Cantabria (Asturllionés-Montañés), País Vascu      (Euskera), Navarra (Euskera), Aragón (Aragonés y Catalán de la Franxa), Cataluña (Catalán y Aranés) Castiella y Lleón   (Asturllionés y Gallegu); Valencia (Catalán-Valencianu), Islles Baleares (Catalán-Mallorquín), Estremaura (Asturllionés-Estremeñu, Gallegu d’Estremaura y Portugués Rayano), y Ceuta y Melilla (Dariya y Tamazight, respeutivamente). Como ves, once comunidaes autónomes y dos ciudaes autónomes tienen llingües diferentes al castellán. Toes elles son españoles, porque toes elles se falen n’España. Namái dexaríen de ser españoles si se dixebren d’España. Llamar al castellán español, supón de facto, Paco, qu’a quienes falen otra llingua distinta nun los consideres españoles. A les clares queda, que  munches d’eses persones te darán les gracies.

En tou casu, Paco, cuanto más intentes ñegar les distintes realidaes culturales; cuanto más  centralista quieras que seya l’Estáu, más lloñe tarán los sos territorios del mesmu. Lo cual,         ye contraproducente dende una visión unitaria del Estáu. Los Borbones, habríen de deprender de los austries pa evitar a lo menos estos futuribles rupturistes, pues son        auténticos cracks del desaniciu. De fechu, Paco, si fuere tu, y fuere monárquicu, taría    naguando por camudar de Dinastía.

  • La Guerra, Paquito Natillas y Les Cunetes: Dientro de la territorialidá y dientro de la vida española ta la visión franquista de la guerra y les sos consecuencies, y llama poderosamente l’atención qu’a los españoles, católicos y fantabulosos, -yos resulte desagradable ya inclusive denunciable qu’otros españoles recuperen los restos mal-tiraos de los sos familiares. Ye dicir, como cristianu esa posición ye cuestionable. Y nun sé, Paco, qué opinará San Pedro cuando te reciba nes Puertes del Cielu. Lo cierto ye qu’eses muertes nun son de la guerra.

Paco, pienses davezu que claro, que deben de cuntar les muertes de tolos bandos. Y efectivamente, más alló de cuál fuere’l conflictu, si hai barbaridaes cometíes pol bandu que seya se denuncia y puntu. Pero…Paco…el problema ye que toes estes muertes son asesinatos producíos fundamentalmente una vez que termina la guerra. Ye dicir, nun hai guerra yá, y España ye’l segundu país tres Camboya con más persones desapaecíes que “descansen” en fuexes comunes. Fíxate cómo sedrá la cosa que’l PSOE, tan d’izquierdes como diz ser, tuvo de tardar 40 años pa entamar cola eshumación de Franco, el pieslle del Valle de los Cayíos, poner una Llei de Memoria Democrática relativamente decente, y entá tenemos fuexes ensin investigar. Ye más, por nun tener, nun tenemos nin los restos d’ún de los mayores poetes en llingua castiellana: Federico García Lorca.

Pola mio esperiencia, nun hai problemes reales colos Pacos del mundiu. En primer llugar, porque les crítiques que faen “a la izquierda” redunden en crítiques reales a les polítiques de dereches. Neses discusiones terminamos, a vegaes, faciendo una suerte de defensa del PSOE un tanto escéntrica.

En segundu llugar, Paco pierde la tiesta cuando se fala de política dende la ideoloxía -la cual él, en sí nun tien-. Dende ehí la discusión se pierde, nel sentíu d’enguedeyase, ente argumentos y narratives mediátiques más o menos filvanaes.

A Paco nun se-y fala dende la teoría marxista o anarquista de turnu. Tampoco dende los axiomes utópicos. Nun se pue falar con Paco n’abstracto o dende xeneralidaes que Paco nun controla, pues ye ehí onde Paco gomita discursu adquirío. Pa que Paco piense y s’entrugue qué narices pasa coles coses, hai de falar con Paco dende la so cai. Dende’l so barriu o parroquia. Darréu, dende’l so conceyu. Darréu, dende’l so país, que quiciabes Paco nun reconoz como tal -o sí-. Darréu, dende’l so Estáu. Darréu, dende’l marcu que-y correspuende a aquél como Estáu Miembru -la XE-. Darréu, dende la xeopolítica d’aquel marcu al que se pertenez.

Que Paco, de magar los espacios más cercanos y cotidianos, discurra cola resta de vecinos y vecines qué ye lo que pasa. Falando específicamente de los temes y faciendo l’analís precisu en xunteta. En dengún casu dende posiciones grandilocuentes o marcadamente partidistes. Porque llueu, habrá estratexes d’actuación d’ameyora de la realidá inmediata que tenga de ser treslladáu dende la vecindá al ámbetu institucional que seya. Ehí, Paco, verá qué formaciones polítiques -poles motivaciones que seyan- asumen el discursu compartíu dende abaxo, que ye’l que denuncia la situación concreta pola que Paco, nesta ocasión se movilizó. Verá les traiciones o non; verá les convicciones o non; verá les llendes o non. Pero lo cierto ye que tendrá un contautu direutu cola realidá del problema que, n’estensión, lu empoderará pa, seique, nun reproducir discursos tóxicos como los que güei defende.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí