Un suxetu político llamáu Asturies

¿Los catalanes sí pueden pero los asturianos tenemos que tar tutelaos por Madrid?

Recomendados

Xune Elipe
Xune Elipe
Músicu, cantante del grupu de rock "Dixebra" y activista en defensa de la llingua asturiana

Nel debate ente les cabeces de llista a les primaries de Podemos Asturies, Covadonga Tomé (Somos Asturies) y Alba González (En Comuña) protagonicé indirectamente una parte del mesmu poles alusiones a un artículu míu publicáu hai unos díes atrás en Nortes, tituláu «Por un suxetu políticu al serviciu de los intereses d’Asturies». Llámame l’atención qu’haya xente que s’estrañe de que daquién como yo defenda los postulaos espreaos nél. La mio trayectoria y el mio pensamientu políticu ye conocíu por tol mundu n’Asturies, nun creo que naide se llame a engañu por ello. Per otru llau, espresé una opinión única y esclusivamente personal, exerciendo la llibertá d’espresión que -creo- tien qu’haber en Podemos Asturies. Reitérome no manifestao nel artículu: la esperiencia vivida nestos años confirmen que ye más necesariu que nunca esi «suxetu políticu» apegáu al territoriu y con capacidá de decisión sobre los asuntos qu’afecten a esta tierra. Yo voi puxar porque Podemos Asturies seya una parte fundamental y central na creación del mesmu, xunto con otres fuercies, movimientos y actores; dalgo que va ser la principal garantía de tener un Podemos más fuerte y con más presencia social y electoral y, lo que ye más importante, poder de decisión real na política asturiana. Ún de los grandes valores del Podemos Asturies orixinal foi la diversidá de tendencies socio-polítiques que s’axuntaron nél, faciéndolu la ‘casa común’ onde poder trabayar pol cambiu que necesita esti pequeñu y maltratáu país. Nel aspectu puramente territorial había xente que se consideraba autonomista, federalista o soberanista, con sentimientu nacional asturianu, español o nengún. Creo qu’esa voluntá de trabayu en común y esa diversidá ideolóxica foi una de les sos mayores y meyores baces. A lo meyor delles persones prefieren escaecelo o desconócenlo porque nun taben naquellos momentos orixinarios.

“El papel xugáu por dalguna xente que se diz «asturianista» en too esto ye, cenciellamente, decepcionante”

Por cuenta del mio artículu hebo della xente que se posicionó a la contra -tán nel so derechu-, pero que tamién aprovechó pa intentar sacar réditu d’él acusándome de deslleal y de tener escures intenciones, cuando non tratándome en plan condescendiente diciendo qu’andaba «despistáu» o que nun «sabía ónde taba metíu». Deslleal ye airear cuestiones internes nos medios de comunicación, deslleal ye acusar de facer «política miserable» al to Secretariu Xeneral, deslleal ye ser la mano executora de Madrid, deslleal ye permitir qu’arrampuñen les perres que diben dirixíes a los movimientos sociales asturianos… El papel xugáu por dalguna xente que se diz «asturianista» en too esto ye, cenciellamente, decepcionante y, cuando menos, sorprendente.

Otra manera, acúsaseme d’incongruente por defender esi «suxetu políticu asturianu» nun partíu como Podemos, quiero facer alcordanza de qu’ésta ye una organización confederal, ye dicir, los territorios llibremente son los que deciden xuntase nun proyectu más ampliu -otra cosa, claro ta, ye la realidá y el control permanente que quier exercer Madrid-. Nel debate la representante d’En Comuña dixo que Somos Asturies quería utilizar Podemos pa otres cuestiones ayenes a él y acusábanos de querer crear otru partíu; menos de diez minutos depués falaba de «los compañeros y compañeres d’En Comú Podem», una plataforma independiente onde s’axunten persones d’ideoloxía mui diversa (ente elles independentistes)… ¿los catalanes sí pueden pero los asturianos tenemos que tar tutelaos por Madrid? Tamién allabó a les marees gallegues, proyectu autónomu nel que taben integraes personalidaes históriques del nacionalismu gallegu como Xosé Manuel Beiras (Anova) y impulsaes, ente otres, por Yolanda Díaz (Esquerda Unida).

Identifícome dafechu cola respuesta que dio Covadonga Tomé nel debate: esi suxetu políticu ye Asturies, necesitamos xente que quiera facer política por, pa y dende Asturies; que’l nuestru marcu específicu de llucha seya la nuestra tierra. Asina llevo defendiéndolo a lo llargo de la mio trayectoria y asina voi siguir faciéndolo, dende la llealtá y el compromisu -mientres me dexen- a toles persones que faen parte d’esta organización. Recuperemos aquel Podemos que nos ilusionó y que permitió trabayar conxuntamente a persones qu’hasta esi momentu nun lo fixéremos, aquel espíritu llogró que per primer vez en muncho tiempu hubiera esperanza pa esti país y posibilidá de cambiar les coses. Volvamos a facer de Podemos Asturies una ferramienta engrasada y al serviciu d’Asturies.

Actualidad

3 COMENTARIOS