Aína sigue cola campaña #AbrimosCamín cola que ta entamando les sos primeres organizaciones llocales. La primera foi la d’El Nalón, la segunda la de Xixón, con un actu nel Centru Municipal Integráu de L’Arena. La principal localidá asturiana tien una trentena d’inscritos
Con hora y media de duración, n’actividá fízose un diagnósticu mui críticu cola situación social, económica y cultural d’Asturies y de Xixón. Cuestiones como la despoblación y l’avieyamientu de la población, les llistes d’espera nes guarderíes y na sanidá, la turistificación, la contaminación, el problema d’accesu a la vivienda, la pérdida d’identidá y comunidá nos barrios o’l retrocesu cultural y asociativu; fueron dalgunos de los temes trataos.
Pa dar respuestes, acolumbráronse los primeros exes sobre los qu’Aína podría entamar el so llabor políticu en Xixón: defender el fortalecimientu y desarrollu de los servicios públicos; ufrir respuestes a la crisis demográfica y económica; trabayar por una vida digna y pola revitalización cultural dende los barrios de la ciudá.
“Nel aconceyamientu informóse del camín andáu pol partíu soberanista d’izquierdes, y los y les inscrites aportaron la so visión de cómo entamar a trabayar” señalen dende Aína. A mediaos d’esti mes va volver haber un nuevu conceyu abiertu pa que puedan participar les demás persones inscrites d’Aína que nun lo pudieron facer esti miércoles, asina como otra xente que tenga enfotu nel proyectu.
Dempués d’esta nueva toma de contactu, va convocase a primeros de febreru la primer Asamblea Llocal de Xixón, zarrada yá a quienes den el pasu d’afiliase na formación y na qu’escomenzarán a definise les llinies d’aición política.
