Zoo va tocar en xunetu en Xixón

La banda valenciana Zoo anunció esti martes la so xira nueva, a la que titularon “Panya” y que va llevalos hasta ochobre a quince llugares, ente conciertos en sales y participaciones en festivales, y qu’empiecen esti sábadu nos conciertos de Falles de València.
Nel 2022 convirtiéronse nún de los grupos revelación nel Estáu español, que remataron con dos conciertos multitudinarios, nel Wizink Center de Madrid y nel Palau Sant Jordi de Barcelona. Zoo encara 2023 con una xira nueva que va llevalos a festivales como’l Viñarrock, Las Noches del Botánico (Madrid), Rototom Sunsplash, Cabo de Plata y Extremúsika.
El grupu de Gandia de rock en valencianu escoyó los conciertos de Falles en plenu paséu de l’Alameda de València pa escomenzar esta xira y cuenten con axuntar ellí, esti sábadu, a más de 15.000 persones.
Según tienen previsto, esti añu 2023, “Panya” va llevalos depués a Zaragoza (15 d’abril), Villarrobledo (Viñarrock, tamién n’abril), Vilanova i la Geltrú (13 de mayu), Vic (17 de xunu), Madrid (24 de xunu), Letur, Barbate y Xixón (xunetu, ensin concretar), Adra, Villena y Benicàssim (agostu), Vilaxoán (setiembre) y Cáceres y Sagunto (ochobre).