Valdesoto: l’epicentru de les mazcaraes

A les 16:30 hora zulú, faltaba una hora tovía pal momentu más esperáu, l’aparcaderu del Estadiu de fútbol Villarea yera un fervideru. Pero ayer sábadu nun se xugaba nengún play off d’acensu, sinon que la parroquia de Valdesoto vivía otra edición más del tradicional desfile de les Xornaes de Mazcaraes d’Iviernu. Una cita, la númeru 13, que volvió a provocar l’éstasis de la mazcarada pelos barrios d’esta parroquia que, pola implicación de los y les sos vecines, merecen tolos premios, reconocimientos y alabances por ser un exemplu de preservar les tradiciones culturales d’Asturies.

Esta esbilla de fotografíes del nuestru fotoperiodista Iván G. Fernández, ye un resume de lo acontecío nel desfile onde participaren más de 200 personaxes. Amás de los Sidros y les Comedies, que xugaben en casa, tamién tuvieron los Mazcaritos d’Uviéu; Entroido de Samede (A Coruña); Les Mazcaraes de Rozaes (Villaviciosa); Zalduondoko Inauteriak (Áraba);Los Zamarrones (L.lena); Diablos de Luzón (Guadalajara); Folión y Boteiros de Viana do Bolo (Ourense). Y un Felo de Maceda (Ourense).