Cuando’l periodista ya historiador Pablo Batalla Cueto retuitió la noticia de que David Guardado Díez (Xixón, 1970) taba acabante de ser nomáu académicu de númberu de l’Academia de la Llingua Asturiana, Carolina del Olmo —filósofa y autora de Dónde está mi tribu (Clave intelectual, 2013)— entrugó nes respuestes: «¿es el de Penélope Trip?».
Esta entruga reflexa perbién la trayectoria intelectual y artística de David Guardado, que pa dalguna xente puede presentar una aparente contradicción, pero que’l nuevu académicu nun vive d’esa manera. La participación nos movimientos de reivindicación llingüística del asturianu, la militancia política y la conexón coles maneres más nueves de facer cultura pop nun son categoríes mutuamente escluyentes, como amuesa’l perfil del filólogu xixonés.
Nacíu en 1970 en Xixón, foi con cinco años a vivir pal conceyu de Piloña, onde tuvo hasta los quince. Esta etapa supunxo una importante toma de conciencia llingüística pa Guardado Díez, porque, según afirma, «anque en mio casa siempre se faló asturianu de Xixón, fui a la escuela en Piloña y tuvi contactu con una comunidá de falantes d’asturianu mui viva». David Guardado taba arrodiáu de xente interesao pola cultura asturiana —el so padre foi sociu de Conceyu Bable, recibía les fueyes informatives y tenía llibros n’asturianu per casa—, pero la etapa de L’Infiestu foi trescendental porque-y permitió entrar en contactu con críos monollingües.
En volviendo a Xixón entamó la so militancia nel asturianismu llingüísticu, cola fundación de l’asociación Teyavana nel institutu Calderón de la Barca, y cuando aportó a la Facultá de Filolxía nel conventu de San Vicente primero y nel ínclitu Campus del Milán depués, a finales de los 80 y primeros de los 90, pa estudiar Filoloxía Inglesa, yá amestara les partes musical y asturianista na so trayectoria: yera’l baxista del grupu Penélope Trip, nel que tuvo ente l’añu 88 y el 94 (Penélope Trip disolvióse en 1997).
Sobre esta época, David Guardado remembra que «nun dexaba de ser como vivir en dos mundos a la vez, pero creo que lo que semamos ehí dalgunos valió pa dalgo». L’ambiente de la música alternativa que se taba faciendo nesa dómina n’Asturies nun taba, a la fin, tan estremáu de los movimientos de reivindicación política y llingüística como dalgunos rellatos posteriores quixeron dar a entender. «Si te poníes a mirar», afirma David Guardado, «topabes persones que taben mui rellacionaes en dambos sitios. Por exemplu, munchos del Xixón Sound parábemos nel Triskel [el chigre irlandés de Fomentu, en Xixón], y munchos del asturianu que taben metíos en coses polítiques paraben en La Plaza», bar que tuvo mui venceyáu a grupos como los propios Penélope Trip, Manta Ray, Nosoträsh, Undershakers o Australian Blonde, como rellató Luis Argeo en La Plaza. Confesiones de un bar musical (Milvecesmil, 2022), y que Tito Pintado, cantante de Penélope Trip, definió nuna ocasión como «Lourdes indie».
Lo que queda claro ye que los dos mundos nos que vivía David Guardado nun taben tan separtaos como pudiere paecer: la reivindicación llingüística del asturianu taba venceyada a los movimientos políticos, pero tamién l’indie d’aquella dómina: como remembra’l nuevu académicu de la Academia de la Llingua, «Penélope Trip, por exemplu, tocamos nun conciertu a favor del Naval», ente otros. Anque muncha xente lu vía como como’l del bable nel Xixón Sound, o como’l modernu del bable, él nun sentía contradicción tala.
Nel cursu 1995-1996 Guardado Diez tuvo en Gales nel centru Mercator de la Unión Europea con una beca, y cuando volvió metióse más a fondo en colectivos como la Xunta Pola Defensa de la Llingua Asturiana, na que foi mui activu, y n’Izquierda Asturiana. A últimos del 96 entamó a trabayar nun proyectu de tresformación dixital que sedría fundamental pal periodismu asturianu del nuevu mileniu: Asturies.com, que creó xunta Fernando de la Fuente nel añu 97, y que lu guiyó al so llabor profesional como espertu en nueves tecnoloxíes, organización de procesos y trabayos y tresformación dixital nel grupu Prensa Ibérica de magar l’añu 2000. También foi creador del buscador n’asturianu ÚLOS?.
Arriendes d’ello, David Guardado tien trabayao dende’l puntu de vista académicu la normalización y estandarización llingüística del asturianu. Frutu d’esti interés foi’l so ensayu Llingua estándar y normalización llingüística: la estandarización de les llingües subordinaes (Araz.net, 2008), que a día de güei sigue siendo una referencia ineludible pa comprender el complexu procesu social qu’arrodia a la llingua asturiana. Anguaño estudia, a partir del análisis del discursu, les estremaes construcciones discursives que se tienen fecho sobre la identidá asturiana a lo llargo de la historia, y los sos estudios van ver la lluz bien llueu nuna monografía.
D’otra manera, David Guardado Díez participó en 2012 —«cuando tuvimos guah.es», según rellata— de la fundación de l’asociación Reciella – Families pol Asturianu, que fai por dar continuidá a la tresmisión interxeneracional de la llingua asturiana.
Tou ello constitúi un perfil personal mui valoratible pal trabayu que desendolca l’Academia de la Llingua Asturiana, que va poder aprovechar mesmo’l perfil académicu de David Guardado —venceyáu a la sociollingüística, a la tresmisión interxeneracional y a la historia esterna del asturianu— que’l so perfil llaboral, que va dar puxu a la renovación tecnolóxica y comunicativa de la institución.
