Nuna charra con Peter Bogdanovich, nos caberos años de la so vida, Orson Welles díxo-y al so discípulu una frase que se convertiría nel títulu d’un documental que narraba esos mesmos años finales del director de F. for Fake: «They’ll love when I’m dead», esto ye, van quereme cuando tea muertu.
Nun puede dicise que sía’l casu de Xosé Bolado (El Sotón, 1945-Madrid, 2021), profesor, críticu, activista y poeta, que foi bien queríu en vida. Sicasí, la celebración de la Selmana de les Lletres de 2023, dedicada a él, ta faciendo apaecer una bayura de testos críticos, lliterarios y testimonios alredor de la so vida que suxeren que, efectivamente, la figura de Xosé Bolado tien tovía muncho que revelanos acerca del so mundu lliterariu y políticu.
Asina puede vese nel volume Xosé Bolado. Fálame dulce (Principáu d’Asturies, 2023), coordináu por Marta Mori pa la Selmana de les Lletres de 2023, onde historiadores, políticos, escritores y críticos como Cheni Uría, Irene Díaz Martínez, Ana Cano o José Luis Argüelles pasen revista a les aportaciones de Bolado a los campos estremaos que trabayó na so vida. Igualmente, el filme documental Na firida del cementu. Vida y obra de Xosé Bolado, dirixíu por Ana Lamela, fai un repasu de la trayectoria biográfica y lliteraria del críticu samartiniegu.
Xosé Bolado nació a la vera del famosu pozu mineru d’El Sotón (Samartín del Rei Aurelio), anque la so partida de nacencia punxere que yera d’Uviéu. Señálalo asina Marta Mori nel prólogu a Palabres blanques (Trea, 2023), una esbilla del llabor críticu del poeta asturianu editada tamién con ocasión d’esta Selmana de les Lletres. Crióse ente la casa familiar d’El Sotón y la casa materna d’El Rubín —no que daquella yera la redolada d’Uviéu— que, como la mesma identidá asturiana, allugábense nun espaciu indefiníu ente lo urbano y lo rural, ente lo industrial y lo tradicional.
Ello, de xuru, contribuyó a formar la ideoloxía y la estética de Xosé Bolado y, yá cuando facía’l Bachilleratu nel Institutu Alfonso II, empobinólu a la militancia antifranquista na Unión Democrática d’Estudiantes Asturianos (UDEA) y, más alantre, cuando estudiaba Filoloxía Románica na Universidá d’Uviéu, nel Sindicatu Democráticu y nel Frente de Liberación Popular (FLP). Organizaría allá tamién dellos recitales de poesía, y unos años depués, siendo yá profesor de secundaria, participaría de la fundación del Movimientu Comunista d’Asturies (MCA), llideráu pol so amigu Cheni Uría, onde fixo aportaciones bien granibles tocantes a la reivindicación llingüística y pol que se presentó a l’alcaldía de Xixón en 1979.
El so secuestru per parte d’un grupu d’ultraderecha en 1976, según afirma Marta Mori, foi quiciás lo que lu guiyó a centrase más nel activismu cultural, onde collaboró con delles iniciatives como Conceyu Bable, la sociedá cultural El Texu o la refundación del Atenéu Obreru de Xixón, qu’algamó a presidir. Nel Atenéu foi responsable de les colecciones lliteraries Tiempu de cristal, fundamental pa la lliteratura n’asturianu, y Deva, de poesía n’asturianu y castellanu. Esta última espublizó dellos llibros rellevantes pa la llírica del últimu terciu del sieglu xx y, ente ellos, ún de los testos esenciales pa dar forma a les nueves corrientes lliteraries que taben apaeciendo n’asturianu: l’Antoloxía poética del Resurdimientu (1989).
Nel prólogu a esti llibru ye precisamente onde Bolado-y pon nome al movimientu que ta apruciendo colos escritores más mozos de les lletres asturianes: el Resurdimientu. Como señala Xosé Ramón Iglesias Cueva nel so artículu «Xosé Bolado: el faru imprescindible», incluyíu tamién en Palabres blanques, la etiqueta propuesta por Bolado —que convivió con otres como Remanecer (creada por Xuan Bello) o Surdimientu (responsabilidá de Xuan Xosé Sánchez Vicente)— facía por resaltar la continuidá histórica de la lliteratura asturiana. Col olfatu lliterariu y políticu que caracterizó a Bolado, el críticu yá quixo refugar les acusaciones d’inventu que daquella entamaben a cayer sobre la llingua asturiana. La llingua y la lliteratura, pa Bolado, taben definitivamente arreyaes a la so historia común, y les condiciones pasaes d’opresión y posibilidá d’una y otra determinaben lo que se podía y nun se podía dicir.
La actividá crítica de Xosé Bolado tocante a la lliteratura asturiana llevólu a ser nomáu académicu de númberu de l’Academia de la Llingua Asturiana en 1988, institución cola qu’espublizó un garrapiellu curiosu de testos de crítica, como los capítulos sobre teatru y poesía que firmó nel que ye’l principal manual de la materia, la Historia de la lliteratura asturiana (ALLA, 2002) de Miguel Ramos Corrada. Foi mui consciente, nes sos aportaciones crítiques, de los reflexos estraños que se producen cuando se crea lliteratura con un gran altor estéticu pero independiente «del destín de la llingua»: según dixo en 1995, nel fascículu 42 de la Historia de Asturias, tituláu Lliteratura contemporánea en llingua asturiana, «estos problemas, extraliterarios, pero que afectan decisivamente a la comunidad lectora y por lo tanto a la recepción literaria, son trampas mortales para el futuro no solo de la lengua sino también de la literatura». Pensaba, en suma, qu’había refugase la lliteratura en tanto que ritual separtáu de la comunidá de falantes.
Nesi sentíu, acuña’l conceptu de Resurdimientu como manera de reclamar una tradición lliteraria fuerte, y esplícalo con detalle nuna ponencia nes Xornaes d’Estudiu de l’ALLA en 1995: «si la aceición primera del verbu surdir afita la idea, el sen, de nacer, d’apaecer, que como yá diximos enriba nun ye lo más axustao pa describir el periodu contemporaneu de la lliteratura asturiana, el Re- antepuestu trai l’alcordanza d’una historia, d’otres dómines na vida cultural d’un pueblu».
Bolado tamién foi director de la revista de creación Lliteratura ente 1990 y 2017, onde pudo espublizar testos de los principales autores de la lliteratura asturiana y, ente ellos, los de so. Arriendes de la lliteratura n’asturianu, tuvo mui interesáu na obra de la feminista Rosario de Acuña: de fechu, foi’l responsable de la edición canónica de la so obra completa en cinco tomos (KRK, 2007-2009).
La bayura de la so actividá política y crítica atapeció, munches veces, el so llabor poéticu. Nun sistema lliterariu como’l asturianu, lo escepcional d’un perfil críticu como’l de Xosé Bolado foi a anubrir les ayalgues de la so obra creativa. Esta entamó, o fíxose pública, rellativamente tarde, con un llibru de versos en castellanu espublizáu cuando tenía 43 años: Línea imperceptible al temor (Atenéu Obreru, 1988), al que bien llueu siguió otru traducíu al italianu, Nomade (1991). Anque dende 1993 Bolado vivió en Madrid, el so compromisu cola lliteratura n’asturianu llevólu a escribir de magar aquella data nesta llingua los sos tres poemarios caberos, Conxura contra la decadencia (Llibros del Pexe, 2002), Na estación de los relevos (Llibros del pexe, 2006) y La bona intención (Impronta, 2012).
La so voz lliteraria, influyida poles formes conteníes de la poesía d’autores como l’alemán Georg Trakl —que, por cierto, ta traducíu al asturianu— guarda rellación cola d’otros autores hispánicos de la so xeneración, pero tien característiques singulares. Carlos González Espina, que foi editor suyu xunta Marina Lobo en Llibros del Pexe, describió nel actu de presentación de la poesía completa de Bolado (Cola suavidá del aire, Impronta, 2023) la so poesía primera como «el frutu maduru d’una sensibilidá y una manera personalísima y decantada de ver el mundu dende la perspectiva que da la esperiencia vital, les llectures, la cultura, la vida, la memoria, la realidá y el deséu», definición que bien puede valir pa la so obra en conxuntu.
La so poesía, como la so vida, mandóse según González Espina de «la manera discreta ya inconfundible que tenía Bolado de facelo too y de tratar cola xente, ensin llevantar la voz, ensin apuru, con suavidá y pulcritú hipnótiques», y ello llevólu a facer una tertulia lliteraria na cafetería yá estinta Oitia, en Madrid, con xente como Berta Piñán, Herme G. Donis o Esther Muntañola, responsable de la antoloxía de la so poesía en castellanu, titulada Un pájaro tan ligero (Bartleby, 2021).
Allá conociólu Alejandro Fernández-Osorio, ún de los escritores más destacaos de la nueva xeneración d’autores asturianos y pal que foi una influencia notable, porque, según Fernández-Osorio, «facía d’aquellos alcuentros un llugar de aprendizaxe y cuidáu horizontal, a diferencia de otres tantes tertulies». El so testimoniu ye mui útil pa comprobar que Bolado nun collaboró namás a pensar la historia de la lliteratura contemporánea n’asturianu, sinón a producila: «Xosé foi, xunto a Berta Piñan, los que me animaron a escribir n’asturianu y volcar a la llingua, que ye dalgo patrimonial y constante en mí, a la voz autorial». Ye d’esti mou que llibros de Fernández-Osorio importantes pa la lliteratura que ta por venir, como Magaya o Tayu, conéctense cola llarga tradición lliteraria qu’emponderó Xosé Bolado.
Si, como diz un versu inéditu de Bolado qu’apaeció nes últimes ediciones de la so obra, «a escures la vida trema’l tiempu / y los apuntes», ta claro que la vida de so travesó la lliteratura asturiana del pasáu, pero tamién la que tovía nun se fixo.
