Van agora diez años que salí d’Asturies, dende’l primer segundu siempres fici por tar en contautu cola realidá asturiana, dende lo cultural a lo social o lo político, defechu hasta toi nun grupu de whatsap de xente que paramos nel mesmu chigre d’Uviéu, sigo en contautu cola mesma xente, hasta conozo xente a la que nun conocía gracies a les redes sociales pero falta dalgo.
La semana pasada foi la Selmana de les Lletres Asturianes, como ye vezu les llibreríes ufríen un 10% na compra de llibros n’asturianu o en gallegu-asturianu y amás daben como de regalu un llibru sobre Xosé Bolado y el comic de Neto “Gladius” que si nun m’alcuerdo mal entamara hai yá munchos años nuna revista infantil de la desaparecida Caxa d’Aforros d’Asturies. Cuando yes emigrante nun solu renuncies a vivir nel to país si non que tamién quedes ensin acceso direutu a oportunidaes determinaes pol fechu de tar más que pol derechu de ser. Na llibrería, na que paro tolos años, yá tienen dalgunos encargos y amás el llibreru yá sabe lo que m’interesa asina que descontáu o non mercar voi mercar y si tengo suerte dalguien me va guardar los llibros de baldre.
El sábadu la TPA volvió emitir una película documental, dicíen que yera l’últimu pase na tele. Abrí l’aplicación del énte públicu asturianu de comunicación y resultó que taben cola cámara enfocada a la plaza de la Escandalera con ambientación sonora de dalguna música rexistrada nun sé sabe onde. ¿Qué papel xuega o tien de xugar la RTPA na so relación cola emigración asturiana, qué pretende tresmitir si bona parte de la so emisión ta bloqueada fuera del territoriu baxo alministración española? Dempués de casi venti años de RTPA sigue teniendo una dimensión provinciana pola voluntá de dalgunos políticos, pos d’otra mano tien unos y unes mui grandes profesionales.
“Dempués de casi venti años de RTPA sigue teniendo una dimensión provinciana pola voluntá de dalgunos políticos, pos d’otra mano tien unos y unes mui grandes profesionales”
Pa rematar esta selmana llegóme l’anuncia d’Adrián Barbón de crear una nueva circunscripción electoral destinada a que la emigración escueya un diputáu. Fechu y derechu, otra vuelta y esta hasta más seria entovía. Una de les mayores anomalíes del nuesu país son les circunscripciones electorales que dividen el territoriu nunes cortes qu’amuesen nun tener un sentíu representativu no políticu pero sí no partidista o electoralista. Ún de los últimos actos alministrativos que fici n’Asturies foi’l de cénsame nun conceyu del centru del país, quixi facelo nún del oriente del que me siento vinculáu pero al facer les cuentes de la realidá decidí non diluyir el mio votu. Abondo tenemos les y los emigrantes esperando saber si los nueses papeletes lleguen a tiempo como pa qu’agora y gracies a la ocurrencia d’Adrián Barbón o de dalgún de los sos asesores tuviéremos que ver como’l nuesu votu directamente nun val nada. Hai que cambiar l’Estatutu, entamando pola oficialidá del asturianu y del gallegu-asturianu, y tamién na forma de rellacionase d’Asturies coles y colos asturianos del esterior más allá de folclorismos y por supuestu eliminando les circunscripciones.
