Andecha Astur denuncia que les Xuntes electorales refuguen les sos papeletes n’asturianu

Les xuntes electorales de zona de Xixón y Uviéu torguen l'usu de les papeletes ellaboraes pola formación

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Andecha Astur, que concurre a estes elecciones autonómiques nes trés circunscripciones de la rexón, denunció güei que les xuntes electorales de zona d’Uviéu y Xixón refugaron validar les papeletes ellaboraes pola formación nacionalista pa repartir a los votantes y que pudieren emplegales el próximu 28 de mayu.

Nun comunicáu, Andecha, que prepara recursos escontra esta decisión, asegura que, igual qu’en comicios anteriores, sometió les sos papeletes al criteriu de la Xunta Electoral Provincial y que les validó pa que pudieren ser usaes polos electores tres encargase de la so impresión el partíu, anque nun ta permitío esponeles nes meses y cabines electorales.

Al so xuiciu, les xuntes de zona d’Uviéu y Xixón escoyeron “nun respetar los derechos electorales y llingüísticos de los asturianos frañendo una trayectoria de cuasi un cuartu de sieglu y dando llugar a una escandalosa, provocativa y antixurídica disparidá de criteriu cola so Xunta superior”.

Amás, Andecha remembra que yá nel 2000 el Tribunal Constitucional dictó una sentencia que permitía a los partíos políticos presentase n’asturianu a las elecciones.

Cola ayuda del Gobiernu del Principáu d'Asturies.

 

Actualidad