La última vez que vi a Yolanda Huergo fue va cuatro años, nos díes últimos de la campaña electoral de 2019. Los medios de comunicación taben convocaos en Xixón un sábadu a mediudía, delantre de La Escalerona, pa una comparecencia conxunta d’ella, como candidata a l’Alcaldía por Podemos-Equo Xixón, y de Lorena Gil, como candidata a la Presidencia del Gobiernu asturianu por Podemos Asturies. Yolanda fue la primer ‘política’ y yo fui’l primer ‘plumilla’ que acudimos a la cita naquel día soleyeru. La candidata xixonesa, la mio candidata, taba derrangada dempués d’una precampaña abegosa y d’una campaña llarga.
Yolanda pidióme opinión sobre lo que tenía pensao dicir a les y los periodistes; yo improvisé un par d’idees y darréu, nun sé por qué, punxímonos a falar de la vida de barriu. Comentamos vivencies sobre los barrios de Xixón que taben venceyaos a la nuesa infancia y a la nuesa vida (Natahoyo, Pumarín, Cimavilla…), barrios que fieden a sobacu obreru y pescador, barrios venceyaos a la nuesa forma d’interpretar el mundu. Yolanda echó una risotada por dalguna chorrada que soltara yo y sorrió fundiendo la so mirada nel Cantábricu. Y a mi nun me cayó embaxo la so sorrisa, porque sabía qu’ella llevaba años combatiendo una enfermedá mui cabrona, y qu’aquello yera al empar un abrazu a la esperanza de la vida y un manotazu a l’amenaza de la muerte.
Conocí a Yolanda Huergo nos años noventa del sieglu pasáu. Yo cubría pal periódicu El Comercio la información de los movimientos de reivindicación llingüística, solidaridá internacional y derechos humanos como «redactor de las causas perdidas» (asina solía llamame con ciñu ún de los mios redactores-xefe). Daquella coincidí en delles manifestaciones pola oficialidá del asturianu con aquella moza siempre tímida pero siempre sorriente que garraba con punxu la pancarta.
La vez primera que charramos fue por un asuntu d’Amnistía Internacional. Yolanda, qu’acababa de llicenciase en Derechu pola Universidá d’Uviéu, taba dándolo too como militante de la Xunta pola Defensa de la Llingua Asturiana y tamién como activista d’Amnistía. Venció la so timidez pa llamame al periódicu y informame d’un actu que convocara la sección asturiana d’Amnistía Internacional, de la qu’ella yera parte fundamental.
Con ventipocos años, la so vida yá xiraba nuna exa de 360 graos: la rotación de quienes creen que nun hai qu’agachar la vista nin aforrar miraes pa dignificar el mundu nin el to país, que ye una parte del mundu. Yolanda nunca abandonó’l meridianu de la oficialidá de les llingües propies d’Asturies nin el paralelu de la dignidá de los pueblos qu’espresen y pronuncien n’otres llingües derechos y llibertaes.
Va cuatro años, baxo la solombra de la enfermedá, Yolanda aparcó un puestu de trabayu estable pa embarcase nuna aventura electoral incierta. Sí, esa mesma Yolanda que disfrazaba na so timidez la bravura p’atrevese a intentar cambiar el país y el mundu…
Güei Rubén Ardura, el compañeru de Yolanda Huergo, pasó pel Grupu Municipal de Podemos-Equo Xixón a recoyer dalgunos oxetos materiales de Yolanda. Ente ellos, esti diorama que voi tener presente neso que llamen la “xornada de reflexón”. Porque, por vez primera, tovía nun sé qué a qué candidatura voi votar esti domingu. Lo que sé ye que nenguna candidata o candidatu municipal xixonés ta siquiera al altor de la suela de los zapatos colos que Yolanda caminó pela vida, pisando prexuicios y conquistando derechos, con esa timidez y con esa discreción que gasta la xente humilde.
Hai tiempu abondo que vengo lleendo allabancies a Yolanda Huergo, ya incluso la engarradiella virtual por cuenta de les palabres que dixo Cándido Carnero nuna entrevista nesti mesmu mediu. Y siempre callando y mordiendo la llingua por cuenta de tratase d’una persona fallecida, pero esto de güei, Paco, ya ye muncho. Paezme perbién que tengas les amistaes que quieras, con quien quieras, tan fonderes como quieras, y que tengas bones pallabres pa elles. Pero lo que nun pue ser nun pue ser. Les allabancies nun pueden basase’n bilordios. Toi que fumo’n pipa con esta hestoria, pero ya valió.
Tú nun me conoces, o quiciabes nun te das cuenta de mí, pero yo sí que m’alcuerdo de ti, de cuando te llamábemos “Paco’l periodista”, de los tos tiempos n’El Comercio. Y tamién m’alcuerdo d’una Yolanda Huergo qu’apaeció na escena política abondo más tarde que tú.
Dices que la conociste más o menos recién terminada la carrera, poco menos que como militante exemplar, cuasi heróica, de dos coses: Amnistía Internacional y la Xunta pola Defensa de la Llingua Asturiana. Y non, Paco, nin militancia exemplar nin nada.
De lo primero nun tengo información de primer mano, porque nin soi abogáu nin toi metíu por esi mundu. Pero sí que recuerdo sentir a Faustino Zapico dicir que Yolanda tinía un importante puestu o responsabilidá n’Amnistía Internacional. Nun sé d’onde sacó elli eses idegues, pero yo, como otra xente, creyíamoslo. Nun pienso qu’ella andara contando tales coses, pero ye más fácil que fuera cosa de Zapico, mui dau a dar más relevancia de la cuenta a los militantes y la actividá del partíu que compartía con Yolanda, que yera Izquierda Asturiana. Mocedá de la organización y mocedá de les persones, y quiciabes una migayina de complexu. Como si la xente fuéramos boba y les coses nun se supieren o se terminaren sabiendo. Y eso foi lo que pasó nesti casu. Munchos años dempués, falando con una persona que nun quiero mentar aquí con nome y apellíos, pero exerciendo la abogacía, y collaboradora d’un sindicatu minoritariu, desmintióme tal protagonismu y fízome cayer la venda de los güeyos. Tolos abogaos más o menos progresistes, asegún terminen la carrera, suelen apuntase a Amnistía Internacional pa entamar a facer currículum. ¿Puedes decinos esautamente cuála foi la so collaboración y los sos méritos en tala asociación? Prestábame escuchalo, porque sedría la primer vez en cuasi 30 años que daquién dea datos concretos envede repetir lo mesmo una y otra vuelta.
Y agora voi dicite otres coses cincante a la llingua. Casualmente yo fui un de los asistentes al conceyu fundacional de la Xunta pola Defensa de la Llingua, que convocó Adolfo Camilo Díaz n’Uvieu con presencia de xente de varies localidaes. Inmediatamente formóse un conceyu de la mesma n’Uvieu nel que metíme a trabayar, con reuniones regulares y trabayu de toda triba. Yolanda d’aquella calculo que diría a primaria.
Años más tarde dos persones (Faustino Zapico ya Iván Huerga) convidáronme a un aconceyamientu d’un partíu nuevu llamáu Izquierda Asturiana. Igual que taba yo presente taben otres persones, unes más conocíes y otres menos. Alcuérdome por exemplu de Rafa Palacios. Entré nesi partíu, hasta que me desengañé. Y desengañéme por coses como qu’ellí nun trabayaba ni dios. De fechu nos foros d’asturies.com o los d’Andecha Astur, o páxines web qu’almitíen artículos o comentarios, a IAS-yos llamaben vagos y dicíen que lo nuestro yera la “comunicaditis”. D’aquélla nun lo tendría dicho por nun tirar piedres pal teyau propiu, pero agora cola distancia tengo que dicir que yera la puñetera verdá. Y tú, Paco, yeres ún de los críticos, sobremanera dende les páxines del selmanariu Les Noticies. Bueno, nun sólo escontra IAS, sinon con tolos partíos asturianistes, nacionaliegos o d’esa triba. Por eso choca agora vete con tantu enclín pa eses idegues.
Nun d’aquellos aconceyamientos n’Uvieu (IAS tenía agrupación tamién en Xixón y Avilés, aparte xente suelto perí, como Naciu Llope en Cangas del Narcea y dalgún más) pidióse a la xente, como una docena de militantes, que teníen que trabayar en dalgo, non sólo reunise internamente). Yolanda Huergo dixo, lliteralmente que-yos daba vergoña. Eso ya da una idega de lo que tanto ella como’l restu la xente taba faciendo como militancia: nothing, rien de rien. Esi partíu, como tantos otros del asturianismu, taba naugurando un nuevu modelu de partíu y de militancia: caún fae lo que quier, como quier y si quier, y si nun quier nun pasa ná. Años dempués, tando negociando Izquierda Asturiana con Andecha Nacionaliega pa formar primero Unidá y dempués UNA, hubo una reunión na que tuvieron presentes Yolanda Huergo, Daniel Fernández y so hermanu Tino por IAS, y Germán Abad pola parte dixebrada d’Andecha. Naquella reunión los tres representantes d’IAS dexaron por mentiroso a Germán Abad cincante a cuántos miembros tenía que tener la futura executiva. Pa quien piense que nun digo verdá, que lo cuente Germán Abad como me lo contaron a mí y corroboré, nun hai más que pregunta-y a elli.
Mentantu y non, por circunstancies yo tinía camudao de ciudá pa Xixón. Ellí el conceyu Orixinal de la Xunta pola despaeciera tiempu atrás. Hubo una discrepancia, apaeció una tropa de militantes del MC, forzóse’l resultáu d’una votación y una montonera de xente dexó de trabayar por esi motivu. Esi conceyu refundámoslu unos cuantos, y pueu dicir con quién: con una moza llamada Pastorela, el so mozu que nun me doi cuenta del nome, l’hermanu del mozu llamau Alfonso, y l’hermanu de Pastorela, llamau Martín. Col tiempu acabó entrando xente nuevu. D’aquella tovía se facía’l conciertu pola oficialidá con dos fines: el propagandísticu y el financieru. ¿Ónde taba Yolanda Huergo? Nun sé, pero na Xunta pola non, y asina foi per munchos años. Vuelvo a lo mesmo: por favor que me digan cuándo y ónde ta la hiper militancia y en qué fechos concretos.
Más tarde, siendo conceyala por Podemos, Foro presentó una moción nel plenu del ayuntamientu de Xixón pa que se reparara’l Hogar del Productor de Ciares. Los únicos que taben a la escontra yeren los socialistes, tolos demás a favor. Qué ficieron los conceyales de Podemos, Yolanda incluyía? Abstenese, porque la iniciativa venía de Foro. Si nun s’abstienen la moción sal, sólo cola oposición de los socialistes, que taben en minoría. Intelixentísima xugada, sí señor.
Per esi mesmu tiempu yo taba na plataforma Un pulmón pal Solarón, fundada por la ex conceyala Verónica Rodríguez, que tenía abandonao Podemos, otru día falamos d’eso. Alcuérdome un día que teníamos puesta una mesa nesi sitiu, y allá pela parte del Tenampa apaez l’alcaldesa Ana González con un séquitu de periodistes y varios conceyales, ente ellos Yolanda Huergo. Pasaron como si nada per delantre la mesa. Nun ye que nun parase pa falar con nós, ye que nin saludar de lloñe, quitónos la cara, como si nun mos viere. Habiendo incluso xente de Podemos (Playu, Fermín, Lorena y otros que nun sé como se llamen, por si quieres preguntar), y quiero esclariar que yo nun pertenezo nin a esi nin a partíu más ningún. Pero menos a un del que conozo estes coses y otres que refugo. Asina que menos haxografíes, compañeru, que todos tenemos claroscuros, y menos por cuenta d’un moñecu.
Después ya de demasiados años fuera del País recuerdo con nostalgia aquellos años en los que muchos soñábamos y creíamos en el asturianismo. Y quisiera seguir creyendo; por lo menos una parte de mí se resiste a abandonar.
Una opción verdaderamente popular que tenga verdadero amor propio, sin ser separatista pero clara y decididamente defensora de Asturies.
Ya de aquella recuerdo las rivalidades cainitas que frenaron y gangrenaron al asturianismo.
Me marché en el 89 a Bélgica. Y tantos años después veo este panorama desolador donde Asturies sigue siendo sucursal lolailo y arsacañí.
Es lo que me hace pensar la respuesta anterior que, ojo, no digo que sea o no real puesto que desconozco la realidad de las afirmaciones. Pero las primera idea que me vino a la mente es esa, que ya de aquella éramos algo más de cuatro los que creíamos en el asturianismo y ahora somos aún menos por esta falta de capacidad de unión. Me identifico cada vez más con los siux😔, quedamos ya cada vez menos y seguimos tirándonos los trastos…