La nube amenazaba, pero hebo mucha xente qu’a pesar d’ello —o, quiciás, precisamente por ello— decidió salir a caleyar pel Paséu de Begoña de Xixón y pela cai Tomás Valiente pa conocer les estremaes propuestes y los 70 puestos de la Feria del Llibru de Xixón 2023. El lema de la edición, significativamente, yera «la gran conversación de la lliteratura». A lo último, como dicía’l director de la FeLiX Jaime Priede, hebo bon tiempu, que ye fundamental nuna ciudá como Xixón.
La Feria del Llibru tuvo llugar dende’l xueves hasta güei y asocedió en paralelu a les tensiones polítiques que remataron cola investidura como alcaldesa de Carmen Moriyón; l’apoyu de VOX, y la frase (con supuestu lapsus) del so alcuerdu de gobiernu, que pasará a los llibros de la historia de la infamia al pretender torgar «los aspectos que supongan igualdá ente persones».
Jaime Priede, director de la feria dende 2020 y responsable, en bona midida, del notable crecimientu d’esta mesmo en calidá qu’en númberos, afirmaba qu’«el ambiente que se ha generado en la feria es muy positivo, de fiesta», puesto que se creara «un espacio de distensión» y se llograra tar «un poco al margen de todo lo que estaba ocurriendo por otro lado».
Con too y con ello, dalgunos de los editores presentes, como Alicia Álvarez, de La Fabriquina, señalaben que sí se notó un incrementu nes compres de lliteratura n’asturianu y de la filoxa qu’acompaña al llibru Nunca vencida, de David Guardado, quiciás como respuesta a la tensión, el mieu y la rabia xeneraos pola entrada de la ultraderecha nel gobiernu del conceyu de Xixón.
Sía como fore, ello ye que la FeLiX 2023 foi quien a caltener y enanchar el camín marcáu dende qu’en 2017 se recuperó, con una perspectiva actualizada, l’antigua feria del llibru de la ciudá que yá tuviera llugar en Begoña: por supuestu, col públicu, que nesta edición enllenó los puestos non namás na fin de selmana sinón dende’l mesmu xueves; pero tamién col apueste por que la programación cultural nun fore namás un complementu de l’actividá comercial, sinón que se convirtiere nun dispositivu cultural coherente nel que «cada actu programáu se xustifique por sigo mesmu como un actu cultural y lo faga de forma paralela a la actividá comercial».
Esti tipu de plantegamientos son los que, d’alcuerdu con Ana María Roza Iglesias, presidenta del Gremiu d’Editores d’Asturies y responsable de Delallama Editorial, faen de la FeLiX la meyor feria del llibru d’Asturies: esti añu, por exemplu, diose una rellevancia especial na programación a la lliteratura fecha p’adolescentes y xente mozo y llogróse, acordies con Jaime Priede, que «mucha gente joven que hasta ahora quedaba en tierra de nadie en la programación se sintieran implicada y protagonista en la feria, y ha sumado un tipo de público que hasta ahora no hemos tenido».
D’esta manera, na programación hebo espaciu pa nomes consagraos de la lliteratura mesmo estatal qu’asturiana: dende Belén Gopegui, Agustín Fernández Mallo, Ray Loriga, Vicente Luis Mora o Elvira Navarro al novelista mexicanu Jorge Volpi, pasando pelos asturianos Ricardo Menéndez Salmón —premiu María Elvira Muñiz de la FeLiX a la trayectoria lliteraria—, Gonzalo G. Barreñada, Pilar Sánchez Vicente o Ángel de la Calle.
Tamién espunxeron les sos propuestes nuevos talentos lliterarios, como Azahara Alonso; María Fernández Abril; Guillermo Menéndez Quirós; Mario Obrero, poeta y presentador del programa de TVE2 Un país para leerlo —al que se gallardonó col premiu María Elvira Muñiz/Feria del Llibru de Xixón 2023 a la Promoción de la Lectura— o Bibiana Collado Cabrera, énte la que se montó una filera curiosa güei de persones que queríen que-yos firmara’l so Yeguas exhaustas.
Lo que ye menos habitual n’eventos como la FeLiX ye que se dea visibilidá a la lliteratura infantil (na sección llamada Felixina, que contó con cuentacuentos como Ana Capilla o David Acera, y cola presentación de la interesante plataforma Nubedecuentos.com de Pintar-Pintar) y, sobre manera, a la lliteratura xuvenil, alcuando llamada pela etiqueta anglosaxona Young Adult y que tuvo un espaciu na feria llamáu «Zona xoven».
L’enfotu de la organización nesti últimu xéneru lliterariu percíbese nel trabayu que se fixo con plataformes dixitales qu’agrupen davezu esta lliteratura (Wattpad) y cola programación d’actos mui populares, como’l coloquiu de les autores Alice Kellen y Andrea Longarela que tuvo llugar el xueves. Según afirma Priede, lo que pretendía la FeLiX yera «evitar todo tipo de prejuicios» p’averase «a ese tipo de literatura a través de coloquios con los autores y autoras, saber por qué la gente joven estaba leyendo eso, qué encuentra en ello, y hablarlo con los autores y autoras».
Esti apueste tenía un aspectu cuasi «periodísticu», y el fechu ye que, según la organización, la xente mozo respondió perbién: «ese prejuicio de que la gente joven no lee y que se comporta no sé cómo lo hemos probado a la inversa. La gente joven lee mucho, lee lo que le interesa, como hicimos todos a su edad, y su comportamiento a la hora de hacer una cola u ocupar un espacio ha sido ejemplar», afirma Priede.
Estes valoraciones son compartíes mesmo polos editores que polos llibreros. El presidente del Gremiu de Llibreríes d’Asturies, Rafael Gutiérrez Testón, de la llibrería La buena letra, destaca que la esperiencia de la Feria del Llibru de Xixón d’esti añu nun puede ser más positiva, y recalca’l papel de la lliteratura xuvenil na FeLiX: «la apuesta de Jaime Priede por la literatura juvenil, y ver la feria llena de chicas y de chicos es una alegría para todos, y viene a desmontar la idea de que la gente joven no lee».
Na importancia de la Feria del Llibru de Xixón coinciden, entós, mesmo Rafael Gutiérrez qu’Ana María Roza Iglesias: pa los editores ye fundamental, porque «las novedades están en las librerías y eso es importantísimo, pero muchas veces el fondo de lo que hacemos no está tan representado por falta de espacio». Acordies con Roza Iglesias, «en las ferias lo que haces es mostrar todo el catálogo que tienes. Aparte de las ventas, que es importante, también se dan a conocer las editoriales asturianas y lo que se hace aquí, que es muy variado, tanto en castellano como en asturiano». Precisamente esti comportamientu simbióticu de la FeLiX a la hora de xunir editoriales asturianes y llibreríes de Xixón señalábalu tamién Gutiérrez Testón como ún de los grande valores de la feria.
Al cabu y al fin, la única incógnita que dexa la Feria del Llibru de Xixón 2023 resulta ser el so futuru, sobre manera a cuenta del cambiu políticu nel conceyu. Mesmo’l Gremiu d’Editores que’l de Llibreros tienen clara la importancia del llabor fechu pola organización de la feria nos años caberos. Jaime Priede, pel so llau, afirma que «si los nuevos responsables de cultura apuestan por mantener el modelo de organización que existe actualmente estaremos encantados de hablar para encontrar puntos en común y seguir trabajando».
El programador cultural, a lo último, trabaya con persones, nun con sigles: «si ellos optan por otro modelo de gestión están en su derecho. Lo importante es que la feria del libro tenga un apoyo institucional, como lo ha tenido en estos cuatro años, porque tiene margen de mejora y de crecimiento». Ta por ver si l’añu que vien, a estes altures, vuelve a haber bon tiempu.
